"Bu şəhərdə”dən qız köçür. Coşqun Rəhimovun evində "Vağzalı” çalınacaq. Məlumat üçün xatırladaq ki, Coşqun Rəhimovun qızının nişanlaması, eləcə də qızının xına mərasimi barədə məlumat vermişdik.
Ailəsinin mediada görüntülənməsindən narahat olan aktyor bir neçə gündən sonra baş tutacaq toy barədə "Şərq”ə danışdı.
- Evinizdən "Vağzalı” sədası gələcək... Qız atası olmaq məsuliyyətlidi?
- İnşallah. Allah hamının balasına belə gün qismət etsin. Mən də qızımı gəlin köçürürəm. Təbii ki, çox çətindi, məsuliyyətlidi. Qız atası olmaq çox böyük məsuliyyət tələb edir. Bu gün bunu daha dərindən başa düşürəm.
- Təəssüratlarınız necədir? Həyəcanlı görünürsüz.
- Çox həyəcanlıyam. Həddindən artıq. Həm də çox xoşbəxtəm. Qız köçəri quşdu. Bir gün qanad açıb mütləq uçacaq. Düzdür, şükür ki, bu günləri Allahım mənə nəsib etdi.
- Neçə övladınız var?
- İki övladım var. Qızım Allahımın ilk payıdır. İkinci övladım oğlandır. Hazırda Türkiyədə təhsil alır.
- Qızınız ailə qurarkən onun seçiminə hörmət etdiniz, ya ailə məsləhəti ilə izdivac qurulur?
- Düzünü deyim. Bu barədə ilk dəfə danışacam. Qızım sevdiyi insanla ailə qurur. Təbii ki, mən də valideyn olaraq bu seçimə hörmətlə yanaşmışam. Amma bir onu deyim ki, qızım seçimini edərkən, qapıma elçi gələndə məni çox təəccübləndirdi.
- Niyə?
- Çünki elə bir insanla ailə qurmağa qərar verdi ki, mən həm təəccübləndim, həm də çox sevindim. İllərlə tanıdığım, ailəcə yaxın olan bir insanla izdivac qurmaq istəyi bizi yaxşı mənada təəccübləndirdi. Bu ailə ilə çox yaxın olsaq da, mən bu izdivacı gözləmirdim. Heç vaxt bunu hiss etməmişdim. Amma çox məmnunam ki, qızımın seçimi məhz, bizi elə bir ailə ilə qohum etdi.
- Gəlin köçən qıza cehiz vermək adətdir. Qızınıza nə cehiz edirsiz?
- Cehiz deyəndə ki, kasıbın olanından, nəyə gücümüz çatırsa... Bilirsiz, bu cehiz ki var, qəliz məsələdir. Mənim qızıma ən böyük, dəyərli cehizim onun ər evinə apardığı namusu, əxlaqı, tərbiyəsi ola bilər. Qızımın ən dəyərli cehizi tərbiyəsidir. Var-dövlət mənim üçün heç vaxt önəmli olmayıb. Əsas xoşbəxt olsunlar. Bizi peşman etməsinlər. Mən hər valideynə övlad toyu arzu edirəm. İnanın ki, çox həyəcanlıyam.
Tahirə
