Bölgələrdə ev quşları arasında xəstəlik yayılıb. Bu barədə sosial şəbəkədə məlumat verən kənd təsərrüfatı üzrə ekspert Vahid Məhərrəmov insanları tədbirli olmağa çağırıb:
"Dostlar, toyuq əti alarkən ehtiyatlı olun. Bölgələrdə toyuq və hinduşqalar arasında xəstəliklər geniş yayılıb. Xəstə ev quşlarının kəsilərək satışa çıxarılması haqda məlumatlar var”.
"Şərq”ə danışan Kənd Təsərrüfatı Nazirliyi yanında Dövlət Baytarlıq Nəzarəti Xidmətinin mətbuat katibi Yolçu Xanvəli isə bölgələrdə ev quşlarının xəstəliyə yoluxması və xəstə quşların kəsilib satılması ilə bağlı məlumatları təkzib edib. Onun sözlərinə görə, baytarlıq xidmətinin Ağsu, İsmayıllı və Şamaxı şöbələri ilə əlaqə saxlanılıb: "Mövsümlə və ya qurd xəstəliyi ilə bağlı ev quşlarının tələfatı mümkündür. Lakin kütləvi tələfat baş verməsi və ya xəstəliklərin yayılması barədə məlumat yoxdur”.
Ötən ay mətbuatda Xaçmaz rayonunun Dədəli kəndində ev quşları (xüsusilə toyuq, hind toyuğu və s.) arasında tələfatın qeydə alınması haqqında məlumat yayılmışdı. Bu məsələyə də aydınlıq gətirən Y.Xanvəli quşlardan nümunələr götürüldüyünü və heyvanların askaridoz (qurd) xəstəliyindən tələf olduğunu bildirib: "Biz bu məlumatlara əsasən, Dədəli kəndində və demək olar ki, Xaçmazın bütün kəndlərində xüsusi reydlər apardıq və narahatlığa əsas olmadığı məlum oldu. Hətta həmin təsərrüfat sahiblərinin də xəstə olduğunu dedikləri quşlardan nümunə götürdük və elə orda baytar həkimlərin sayəsində müayinələr apardıq. Müayinə nəticəsində onların öz şahidliyi ilə müəyyən edildi ki, tələf olan quşlarda yoluxucu olmayan qurd xəstəliyi var. Sonradan etiraf etdilər ki, tələfat kütləvi deyil, tək-tək olub”.
Quş əti və məhsulları istehsal edən müəssisələrdə fəaliyyət göstərən laboratoriya mərkəzləri ilə də sıx əlaqə yaratdıqlarını qeyd edən qurum sözçüsü təsərrüfatlarda xəstəliklərə qarşı önləyici tədbirlərin görüldüyünü deyib.
Bununla bərabər, Dövlət Baytarlıq Nəzarəti Xidməti əhalinin və təsərrüfat sahiblərinin nəzərinə çatdırır ki, ev quşlarında, heyvanlarda özbaşına müalicə-profilaktika tədbirləri aparılmamalı, heyvanlar baytarlıq-sanitariya tələblərinə cavab verən şəraitdə saxlanılmalıdır. Həmçinin, heyvanlarda və quşlarda hər hansı narahatlıq olarsa, vaxtlı-vaxtında sahə baytarlıq məntəqələrinə, rayon (şəhər) baytarlıq idarələrinə müraciət edilməsi tövsiyə olunur.
Aysel Aslan
