Rusiyanın Baş nazirinin müavini Dmitri Roqozin bu gün Bakıya səfər edəcək. Bu haqda "İnterfaks-Azərbaycan” məlumatlı mənbəyə istinadən bildirir. Xəbərə görə, Rusiya rəsmisi Azərbaycan rəhbərliyi ilə danışıqlar aparacaq. Səfər çərçivəsində Rusiya prezidenti Vladimir Putinin may ayının sonlarında Bakıya gözlənilən səfərinə dair hazırlıq işləri müzakirə olunacaq.
Eyni zamanda o da gözlənilir ki, Roqozin Bakıda Qarabağ münaqişəsi ətrafında yaranmış vəziyyəti də müzakirə edəcək. Xatırladaq ki, D.Roqozinin səfəri Vyanada Azərbaycan və Ermənistan Prezidentləri arasında Minsk Qrupu həmsədri olan ölkələrin xarici işlər nazirlərinin vasitəçiliyi altında keçiriləcək danışıqların ertəsi gününə təsadüf edir.
Səfərin məqsədini şərh edən hərbi ekspert Üzeyir Cəfərov "Şərq”ə söyləyib ki, D.Roqozin Prezident Vladimir Putinin ən etirablı silahdaşlarından biridir: "Çünki bundan əvvəl Rusiyanı NATO-da təmsil edirdi. İndi Baş nazirin müavinidir. Sırf hərbi sənaye sahəsinə cavabdehlik daşıyan şəxsdir. Bu ilin mart ayında Moskvadan Bakıya göndərilən silah-sursatla bağlı Rusiya ilə Azərbaycan arasında bir balaca gərginlik yaşanmışdı. Onların göndərdiyi silah-sursat müqavilədə göstərilən parametrlərə uyğun deyildi. Azərbaycan tərəfi də haqlı olaraq prinsipiallıq nümayiş etdirdi. Həmin silahları qəbul etmədi. Bu da şimal qonşumuzu narahat etdi. D.Roqozin və nümayəndə heyəti Bakıya gələndə mütəxəssislərin iştirakı ilə o silahlara baxış keçirildi. Silahlarla bağlı Azərbaycan tərəfi Rusiyaya vaxt verdi. Belə anlayıram ki, həmin problem hələ də həl olunmamış qalır. Roqozin də ona görə gəlir ki, Azərbaycan tərəfi həmin silah-sursatı tam şəkildə qəbul etsin. Bu çox böyük müqavilədir. Ciddi məbləğdən söhbət gedir. Ona görə də Rusiyanın buna çox böyük ehtiyacı var”.
Ekspertin fikrincə, Roqozinin Bakı səfərinin Dağlıq Qarabağ münaqişəsi ilə heç bir bağlılığı yoxdur: "İndiki məqamda Moskvanı ancaq öz iqtisadiyyatı maraqlandırır. Bu baxımdan hərbi sənaye kompleksi ən gəlirli sahədir. Moskva çalışır ki, büdcəni satılan silah-sursatlar hesabına doldursun. Bir sözlə, Roqozinin səfəri Moskva-Bakı arasındakı əvvəlki müqavilələrin şərtlərinin yerinə yetirilməsi və perspektiv üçün yeni silah-sursatın alınıb, satılması ilə əlaqədardır”.
Ayyət Əhməd
