Ermənistan prezidenti Serj Sarkisyan hazırkı mərhələdə Dağlıq Qarabağ münaqişəsini hərbi yolla həll etmək niyyətində olmadığını deyib. Erməni rəhbər bildirib ki, onların savaşı başlatmaq məqsədləri yoxdur:
"Münaqişənin hərbi yolla həllini istəmirik. Amma bir əllə atəş açıb, digəri ilə danışıqlar aparmaq mümkün deyil. Biz ya danışıqlar aparmalı, ya da atəş açmalıyıq. Ermənistan hər iki varianta hazırdır”. Sarkisyan Cenevrə görüşündən dərhal sonra ictimaiyyətə verdiyi təxribatçı açıqlamaya bu cür bəraət qazandırıb: "Səmimi deyirəm, Cenevrədəki danışıqların ardından Azərbaycan tərəfinin, guya oradakı hansısa razılıqları pozduğum barədə məqamı qəzəblə vurğulamağa çalışması məni təəccübləndirdi.
Bu qəribədir və mən Azərbaycan Prezidenti İlham Əliyevlə növbəti görüşümüzü gözləyirəm. O zaman həmkarımdan soruşacam ki, qarşı tərəfdə bu qəzəb haradan doğub?”.
Sarkisyanın əvvəlkindən fərqli açıqlamasını "Şərq”ə dəyərləndirən Cənubi Qafqaz Təhlükəsizlik və Sülh İnstitutunun rəhbəri Məhəmməd Əsədullazadə deyib ki, Cenevrədə prezidentlərin görüşündən sonra Sarkisyanın verdiyi məlum açıqlamalar danışıqlar prosesini sabotaj etmək, növbəti görüşlər üçün heç bir şans buraxmamaq məqsədi güdürdü:
"Sarkisyan birmənalı qeyd edirdi ki, Qarabağ Azərbaycanın hüdudlarından kənarda olmalıdır. Təbii ki, bu ifadələrdən sonra Ermənistanla danışıqların aparılması qeyri-məqbuldur. Sarkisyanın davakar və kompromizsiz açıqlamaları regionda yenidən müharibənin başlanması üçün əsas katalizator rolunu oynayır”.
Siyasi şərhçi bəyan edib ki, Azərbaycanın kəskin mövqeyi, hərbi qüdrəti və rəsmi Bakıdan verilən sərt mesajlar Sarkisyanın mövqeyində dəyişikliklərə səbəb olub: "Sarkisyan heç bir danışıqları pozmadığını, razılaşmaya sadiq qaldığını iddia edir. Məncə, bu yanaşma növbəti erməni hiyləgərliyinin bariz nümunəsidir. Sarkisyan yenidən Prezident İlham Əliyevlə görüşməsini dilə gətirməklə, mümkün cəbhədə təzyiqlərdən yayınmaq niyyətindədir. Guya danışıqlara sadiq olduğunu göstərir. Hesab edirəm ki, Ermənistan prezidenti növbəti danışıqlar üçün mesaj vermiş oldu. Bunu Azərbaycanın düşmən üzərində psixoloji qələbəsi saymaq olar”.
İsmayıl
