Tanınmış iqtisadçı Vüqar Bayramov "Şərq”ə sosial evlərin tikilməsi prosesinin ləngimə səbəblərindən danışıb. Ekspert diqqətə çatdırıb ki, ölkə Prezidentinin fərmanı ilə sosial evlərin inşasına dair xüsusi agentlik formalaşdırılıb:
"Amma sosial evlərin tikilməsi zaman və böyük məbləğdə vəsait tələb edir. Əslində bu layihənin gerçəkləşməsinə illər öncə başlanmalı idi. Məsələn, 2010-cu ildə sosial evlərin inşasına başlamaq üçün maliyyə imkanları vardı. Təəssüf ki, bu proses yubandı. Buna rəğmən güman olunur ki, bu ilin sonuna qədər sosial evlərin tikintisi ilə bağlı qaydalar müəyyənləşsə, 2018-ci ilin ortalarında ilk sosial evləri istifadəyə vermək mümkün olacaq. Dərhal vəsait ayrılsa və bundan sonra proses başlansa, növbəti iki ilə ilk sosial evlər istifadəyə verilə bilər. Əlbəttə, ötən illərdə bu prosesi daha sürətlə aparmaq olardı. Təəssüf ki, yubandı. Hər halda layihənin cari ildə də başlaması müsbət haldır. Təbii ki, hökumət prosesi sürətləndirməyə çalışmalıdır. Gərək torpaq sahəsinin və vəsaitin ayrılması sürətlənsin ki, 2018-ci ilin ortalarında ilk sosial evlərin istifadəyə verilməsi mümkünləşsin”.
Mənzillərin verilmə şərtlərindən söz açan ekspertin sözlərinə görə, bu evlər çox güman ki, aztəminatlı ailələrə veriləcək: "Hesablamalar da göstərir ki, gənc ailələr ilkin ödəniş olmadan ayda 150 manat ödəməklə iki otaqlı mənzilə sahib ola biləcəklər. İki otaqlı mənzilin təxminən 40 kvadratmetr ətrafında olacağı gözlənilir”.
Ayyət Əhməd
