Azərbaycanda minimum əmək haqqı, pensiyaların minimum məbləği və yaşayış minimumu həddi tədricən artırılacaq. Bu məsələ 2018-ci ilin dövlət büdcəsinin zərfində nəzərdə tutulub. Verilən məlumata görə, gələn ilin büdcəsində maaşların artması, tələbələrin ödənişlərdən azad edilməsi və birdəfəlik müavinətlərin verilməsi öz əksini tapacaq.
Bununla yanaşı, əlilliyə, ailə başçısının itirilməsinə, sağlamlıq imkanları məhdud uşaqlara aylıq ödənişlərin, şəhid və müharibə əlillərinə verilən aylıq müavinətlərin artırılması istiqamətində tədbirlərin həyata keçirilməsi nəzərdə tutulub. Həmçinin, milli qəhrəmanların ailələrinə birdəfəlik müavinətlərin artırılması planlaşdırılıb.
Büdcə zərfi ilə bağlı "Şərq”ə danışan Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov deyib ki, keçən ilin dövlət büdcəsində olduğu kimi bu il də sosial sahəyə daha çox diqqət ayrılıb:
"Dövlət büdcəsinin təxminən 36 faizi sosial müavinətlərə ayrılıb. Bura əmək haqları, pensiyalar və s. ödənişlər daxildir. Büdcə zərfinə əsasən, deyə bilərəm ki, gələn il maaşlarda, təqaüdlərdə və sosial müavinətlərdə müəyyən artımlar olacaq. Amma artımların miqdarının nə qədər olacağı bəlli deyil. Çünki əmək haqları və müavinətlərdə nəzərdə tutulan artım birbaşa cənab Prezident tərəfindən verilən sərəncamlarla müəyyən edilir”.
İqtisadçı-ekspert Rəşad Həsənov isə hesab edir ki, gələn ilin büdcəsində nəzərdə tutulan sosial xərclər faiz etibarı ilə geriləyib:
"Büdcə xərcləri 16,5 faiz artırılaraq 20,9 milyarda çatdırılıb. Ötən illə müqayisədə 3 milyard manata yaxın artıq xərcləmə nəzərdə tutulub. Xərcləmənin təxminən 1 milyardı sosial istiqamətə hədəflənib. Belə ki, 2017-ci ildə büdcədə sosialyönümlü xərclərin həcmi 6.7 milyard idisə, 2018-ci ildə bu xərclər 7,7 milyard manata qalxıb. Bu artım büdcənin ümumi artım tempi ilə uzlaşmır. Sosial yönümlü xərclərin büdcənin ümumi strukturundakı çəkisi 36,6 faiz olacaq. Halbuki cari ildə bu göstərici 40,2 faiz həcmində proqnozlaşdırılmışdı. Bu istiqamətdə təxminən 3,6 faiz geriləmə var”. İqtisadçı vurğulayıb ki, xərcləmələr daha çox əsas vəsait qoyuluşlarına yönəldilib: "İnvestisiya qoyuluşlarının həcminin artırılması nəzərə tutulur. Əmək haqlarının artımı təxminən 104 milyon manat həcmində proqnozlaşdırılıb. Nəticədə 2018-ci ilin dövlət büdcəsinin 20 faizi əmək haqlarına yönəldiləcək ki, bu da 4,2 milyard manat deməkdir. Əmək haqlarının artım istiqaməti daha çox təhsil istiqaməti üzrə nəzərdə tutulub. 104 milyon manatlıq əmək haqqı artımının 70 milyonu 26 rayonda təhsil işçilərinin diaqnostik qiymətlərinin nəticələri üzrə müəyyən ediləcək”.
İsmayıl
