20-ci əsrin vəbası hesab edilən QİÇS (Qazanılmış İmmunitetin Çatışmazlığı Sindromu) təhlükəli xəstəliklər siyahısından çıxarılır. Məlumata görə, avstraliyalı elm xadimləri bu ölkədə həmin xəstəliyin təhlükəli həddə olmadığını açıqlayıblar.
ABC telekanalı bildirir ki, son zamanlarda QİÇS-ə yoluxan avstraliyalıların sayı yox deyiləcək qədər azdır. Alimlər hesab edirlər ki, artıq bu xəstəliyin nəzarətdə saxlanmasına ehtiyac yoxdur: "İnsanlar buna müalicəsi olan xəstəlik kimi baxırlar. QİÇS-ə yoluxanlar müalicə alırlar və xəstəlikdən xilas olurlar”. Maraqlıdır, görəsən, Azərbaycan da QİÇS təhlükəsiz xəstəlikər sırasına daxil edilə bilərmi və buna zəmin, şərait varmı?
Suallarımızı cavablandıran həkim-terapevt Şəmsiyyə Namazova qeyd edib ki, bu məsələnin Azərbaycanda reallaşması mümkünsüzdür. Ekspertin sözlərinə görə, hazırda QİÇS Ümumdünya Səhiyyə Təşkilatı (ÜST) üçün ən təhlükəli xəstəliklərdən sayılır: "Çünki bu xəstəlik çox qısa müddət ərzində yayıla bilir. Qan mübadiləsi, orqanların transplantasiyası, eyni əşyadan istifadə, cinsi əlaqə zamanı yaranır. Bu xəstəlik narkomanlarda daha geniş yayılır. Çünki bəzən bir iynədən bir neçə narkoman istifadə edir. Bir narkomanda QİÇS varsa, o biri yoluxur. Bu cür qısa müddətdə yayılan xəstəliyi adi xəstəliklər sırasına daxil etmək olar? ÜST bu xəstəliyin qarşısının alınması üçün vaksinlər hazırlamağa çalışır və buna nail ola bilmir. ÜST-nin mübarizə apardığı bir xəstəliyi necə qeydiyyatdan çıxarmaq olar? Təsəvvür edin ki, bu xəstəlik hamilə qadında varsa, ana bətnindəki uşağa da keçir. Buna qarşı necə mübarizə aparmamaq olar? Məncə, Avstraliya öz vətəndaşına sahib çıxmır deyə, belə addım atıb. Baxın, indi yay mövsümüdür. Bütün ölkələrə turist axını var. Belə bir dövrdə QİÇS-ə qarşı mübarizəni dayandırmaq təhlükəlidir. Hesab edirəm ki, xəstəliyi xüsusi xəstəliklər sırasından çıxarıb, adi xəstəliklər sırasına salmaq ictimai və şəriət qanunlarına ziddir. Azərbaycanda həmin xəstəliyin qeydiyyatdan çıxarılması mümkünsüzdür və heç lazım da deyil”.
Ayyət Əhməd
