Azərbaycanda köhnəlmiş və təhlükəsizlik səviyyəsi aşağı olan avtomobillər dövriyyədən çıxarılacaq. Bununla bağlı məsələ "Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”nda öz əksini tapıb.
Dövlət Proqramında nəqliyyat vasitələrinin təhlükəsizliyinin təmin edilməsi məqsədilə nəqliyyat vasitələri üçün müasir texniki reqlamentlərin hazırlanması və tətbiqi, nəqliyyat vasitələrinə texniki xidmətin keyfiyyətinin artırılması, onların texniki vəziyyətinə nəzarətin və texniki baxış qaydalarının təkmilləşdirilməsi, yeni texnologiyalardan istifadənin sürətləndirilməsi məqsədilə müasir təhlükəsizlik vasitələrindən və texnologiyalarından geniş istifadənin təşviqi, köhnəlmiş və texniki təhlükəsizlik səviyyəsi aşağı olan nəqliyyat vasitələrinin dövriyyədən çıxarılması planlaşdırılır.
Bir sıra ekspertlərin fikrincə, standartlara cavab verməyən avtomobillərin dövriyyədən çıxarılması mərhələli şəkildə həyata keçirilməlidir.
"Yol hərəkətinin təhlükəsizliyinə dair 2019–2023-cü illər üçün Dövlət Proqramı”nın təsdiq olunmasını müsbət dəyərləndirən nəqliyyat üzrə ekspert Ərşad Hüseynov belə bir Proqrama ciddi ehtiyac olduğunu deyib.
Proqramın kifayət qədər geniş olduğunu vurğulayan ekspert deyib ki, sözügedən Proqramda yol hərəkəti təhlükəsizliyinin bütün elementlərini əhatə edən tədbrilər nəzərdə tutulub: "Əsas ana xəttlərdən birini intizamlı və təhlükəsiz hərəkət iştirakçıları təşkil edir. Nəqliyyat parkının sazlığı və təhlükəsizliyi, texniki baxışın tam yeni prinsiplər üzrə qurulması, bu işin dövlət qurumları deyil, özəl sektor tərəfindən həyata keçirməsi məsələsi də orada öz əksini tapıb.
Konkret hədəflər də qoyulub. Özü də hədəflərdən heç biri fantastik deyil. Onların hamısını real icra edə bilərik. Əsas ideya odur ki, yollarımızda müasir dövrə uyğun təhlükəsiz, fasiləsiz və rahat hərəkət olsun, zəruri mobillik təmin olunsun.
Bu Proqram konkret iradə və istəyin rəsmi ifadəsidir. Düşünürəm ki, onun real icra ediləcəyi təqdirdə yaxın gələcəkdə ciddi keyfiyyət dəyişiklikləri də görə biləcəyik...”
Konkret olaraq köhnə avtomobillərin dövriyyədən çıxarılması məsələsinə gəldikdə isə Ə.Hüseynov deyib ki, Proqramda avtomobilin ili əsas kimi götürülməyib: "Dünyanın əksər ölkələrində 40-50 yaşı olan retro avtomobillər var, tam saz vəziyyətdədir. Əsas avtomobilin yaşı deyil, avtomobilə qoyulan texniki tələblərə, standartlara uyğunluqdur. Texniki tələblərə, standartlara uyğun olmayan nəqliyyat vasitələri ləğv ediləcək, bu, dünyanın hər yerində belədir”.
Şəymən
