"Xətai rayonunda baş verən qəza həqiqətəndə arzu olunmaz haldır”
Bunu "Sherg.az”a Xətai royonunda 4 nəfərin ölümü ilə nəticələnən yol-nəqliyyat hadisəsi barədə danışarkən nəqliyyat ekperti Fərhad Eyyubov bildirib.
Onun sözlərinə görə, sözügedən yol qəzası çox dəhşətli bir hadisədir:
"Bu yol-nəqliyyat hadisəsinə səbəb yüksək sürət həddini göstərirlər. Məncə, bu, belə deyil. Çünki belə olayların baş verməsində tək sürət rol oynamır. Bildiyimə görə, maşın hərəkətdə olduğu zaman arxa təkərinin partlaması nəticəsində sürücü idarəetməni itirib. Eyni zamanda sürət həddi də yüksək olub. Sürət az olduqda baş verən hadisələr belə ağır qəzalara yol açmır.
Ammma sürət yüksək olduqda avtomobilin arxa təkərinin partlaması bundan da dəhşətli qəzalar törədir. Bundan əlavə qəzaya avtomobilin texniki problemləri də səbəb ola bilər. Şəhərin içərisində yüksək sürət həddi insana o qədər də məntiqli gəlmir. Şəhər daxilində sürət 60-dan yuxarı olmamalıdır. Qəzanın baş verməsində sürücü və avtomobilin texniki qüsurları əsas rol oynayan faktorlardır”.F. Eyyubov onu da bəyan edib ki, bəzən bu cür qəzalar başqa avtomobillərin hərəkətlərinə də əks təsir göstərir:
"Nəticədə zəncirvari qəzalar baş verir. Hətta bir maşının qəza törətməsi onlarla avtomobili arzuolunmaz hadisənin içərisinə çəkə bilər. Bəzi xarici ölkələrdə belə qəzalar baş verdikdə olayı ətraflı araşdırırlar. Və hadisənin yaranma səbəblərinin aradan qaldırılması istiqamətində dövlət vəsait ayırır. Beləliklə də, bu cür qəzalar bir daha təkrarlanmır”.
Qeyd edək ki, sentyabrın 20-də "Hyundai" markalı avtomobil Xətai rayonu, Nobel prospekti ilə yüksək sürətlə hərəkətdə olarkən idarəetmədən çıxaraq Əbilov küçəsi, 17 ünvanında elektrik dirəyinə çırpılıb. Hadisə nəticəsində avtomobil hissələrə bölünüb və içərisində olan 4 nəfər hadisə yerində dünyasını dəyişib.
Kənan Eynuroğlu
