"Əhalinin banklara borc yükünün müəyyən çərçivəyə salınması ilə bağlı yeni addımlar vətəndaşların borclarına müsbət təsir göstərmir”.
Bunu "Sherg.az”a Maliyyə Bazarlarına Nəzarət Palatasının (MBNP) baş icraçı direktoru İbrahim Alışovun "Azərbaycan əhalisinin banklarla bağlı borc yükünün müəyyən çərçivəyə salınması ilə bağlı addımlar atılır” acıqlamasını şərh edərkən iqtisadçı-ekspert Fuad İbarhimov bildirib.
Onun sözlərinə görə, Əslində MBNP-ın bildirdiyi məlumatda elə bir qeyri-adilik yoxdur:
" Bildiyimiz kimi, 2015-2016-cı illər devalvasiyadan sonra vətəndaşların kütləvi şəkildə müraciətlərinin nəticəsi olaraq Ali Məhkəmə vahid bir qərar verdi. Bəyan etdi ki, əhali banklar qarşısında olan öhdəliklərini həyata keçirməlidir. Bundan sonra diferensial qaydada hər bank öz müştərisi ilə danışıqlara getdi. Banklar bəzi güzəştlər və ya çətinlliklər yaratsa da, yenə vətəndaşlar börclarını ödəməli oldu.
Əhalinin banklara borc yükünün müəyyən çərçivəyə salınması ilə bağlı atılan addım vətəndaşların borclarının azalmasına aparan bir yol deyil. Sadəcə, bankların işləri üzrə bir mexanizm həyata keçirilir. Bunu vətəndaşlara stimul verən bir tədbir kimi qiymətləndirmək doğru olmaz. Nəzərə almaq lazımdır ki, vətəndaşlarla yanaşı banklar da çətin vəziyyətə düşdü.
Burada ən azından kredit faizləri dayandırılmalı, dövlət tədbirləri həyata keçirilməli idi. Lakin icraçı direktorun açıqlaması sadəcə populist bir çıxışdır. Burada elə bir əsaslı tədbir görülməyib, yəni, prosedur qaydaya uyğun azalır. Sadəcə burada statistik məlumat verilir”.
Qeyd edək ki, Maliyyə Bazarlarına Nəzarət Palatasının (MBNP) baş icraçı direktoru İbrahim Alışov Bakıda keçirilən 7-ci Beynəlxalq "Caspian Energy Forum Baku-2018" tədbirində Azərbaycan əhalisinin banklarla bağlı borc yükünün müəyyən çərçivəyə salınması ilə bağlı addımlar atıldığını və artıq bu addımların nəticəsini verdiyini bildirib.
Kənan Eynuroğlu
