Dövlət İmtahan Mərkəzi (DİM) tərəfindən mayın 12-də 1-ci və 4-cü ixtisas qrupu üzrə qəbul imtahanları keçirilib. İmtahanda abituriyentlərə 1-ci ixtisas qrupunda riyaziyyat, fizika və kimya fənləri üzrə, 4-cü ixtisas qrupunda isə biologiya, kimya və fizika fənləri üzrə ümumilikdə 90 tapşırıq təqdim edilib. Abituriyentlərə hər fənn üzrə 30 test tapşırığı təqdim olunub. Bu tapşırıqların 22-si qapalı, 8-i isə açıq tiplidir.
İmtahan nəticələri ilə bağlı "Sherg.az”a danışan tarix elmi üzrə fəlsəfə doktoru, təhsil eksperti Kamran Əsədov bildirib ki, imtahanda iştirak etmiş 32174 abituriyentdən yalnız 1 nəfər 1-ci ixtisas qrupu üzrə ona təqdim olunmuş bütün test tapşırıqlarına düzgün cavab verərək maksimal nəticə - 400 bal toplayıb.
Ekspert qeyd edib ki, 4-cü ixtisas qrupu üzrə maksimum bal toplayan abituriyent olmayıb:
"Əvvəlki illərlə müqayisədə görürük ki, maksimum bal toplayan abituriyentlərin sayında bu il ciddi şəkildə azalma müşahidə olunur. Xüsusilə də bu 4-cü ixtisas qrupu üzrə açıq şəkildə görünür. 2018-ci ildə isə 1-ci ixtisas qrupu üzrə yaz imtahanında 2 nəfər, 4-cü ixtisas qrupu üzrə isə 1 nəfər maksimum -700 bal toplayıb. 2018 - ci ildə yaz imtahanında 32139 nəfər iştirak edib. 2017-ci ildə I qrup üzrə 6 nəfər yaz imtahanında maksimum - 700 bal, IV ixtisas qrupu üzrə 2 abituriyent yaz imtahanında maksimum bal yığıb”.
K.Əsədov qeyd edib ki, I və IV ixtisas qruplarında 700 bal toplayan abituriyent olmayacaq:
"Çünki buraxılış imtahanlarında maksimum bal toplayan abituriyent 2 nəfərdir və onlar digər qruplarda imtahanda iştirak edir. Eyni zamanda buraxılış imtahanlarında maksimum balın olmaması 700 balın olmamasına gətirib çıxarır”.
Yeganə Bayramova
