Fransa lideri geri çəkildi, artıq sülhə ümid bağladı
"Avropa Siyasi Birliyi"nin 6-cı Zirvə toplantısı çərçivəsində Fransa Prezidenti Emmanuel Makron Azərbaycan Prezidenti İlham Əliyevə yaxınlaşaraq görüşüb. Fransa prezidenti tezliklə Azərbaycan və Ermənistan arasında sülh sazişinin imzalanacağına inandığını bildirib və bu yöndə dəstəyini ifadə edib. Vurğulayıb ki, Fransa Azərbaycanla Ermənistanın sülhün əldə edilməsi və sülh sazişinin imzalanması yönündə səylərini dəstəkləyir.
Politoloq Azər Qasımov Sherg.az-a deyib ki, Albaniyada keçirilən Zirvə toplantısında yayımlanan görüntü ilk növbədə Azərbaycanın siyasi iradəsinin nümayişi idi. Ekspertə görə, hətta Fransa Prezidenti Emmanuel Makron da bu iradənin qarşısında aciz olduğunu isbatladı:
"Makron Azərbaycan lideri İlham Əliyevin siyasi fiqur kimi avtoritetinin qarşısında geri çəkildiyini göstərdi. Fransa rəhbəri Azərbaycanla qarşıdurmanın mənasız olduğunu qəbul etdi. Azərbaycan Prezidenti də böyüklük edib Makronu pərt etmədi. Baş verənlər təbii ki, dünya liderlərinin və ictimaiyyətinin qarşısında yaşandı. Hər kəs Azərbaycanla Fransa arasında məlum gərginlikdən xəbərdar idi. İndi onlar kimin mövqeyinin daha güclü olduğunu gördülər. Hesab edirəm ki, bu hadisədən sonra Fransa sırf Ermənistanla əlaqələrə görə Azərbaycana qarşı yürütdüyü yanlış siyasətini dəyişəcək. Rəsmi Paris Azərbaycanla konstruktiv münasibət yolunu tutacaq".
