Polşanın Lyublin voyevodalığında, Belarusla sərhədin su hissəsində elektron maneə tikilir.
“Report” Polşa KİV-ə istinadən xəbər verir ki, bu barədə ölkənin daxili işlər və administrasiya naziri Tomaş Semonyak bildirib.
“Polşa-Belarus sərhədində, Lyublin voyevodalığında, sərhəddə yerləşən Buq çayı üzərində elektron maneənin qurulması üzrə işlər aparılır. Elektron təhlükəsizlik divarı iyulun 20-dək tam hazır olacaq. Bu, sərhəd təhlükəsizliyinin təmin edilməsi üçün son dərəcə vacib vasitədir”, - qurum rəhbəri deyib.
Bildirilir ki, hasara kameralı 1,8 minə yaxın dirək, 4,5 min gecə-gündüz və termal müşahidə kameraları, habelə obyektlərin müxtəlif fiziki xüsusiyyətlərini aşkar edən xüsusi sensorlar daxildir.
Xatırladaq ki, bu ilin mart ayında Polşa Sərhəd Xidməti Podlyaske voyevodalığının (Belarusun Qrodno və Brest vilayətləri ilə həmsərhəddir – red.) sərhədyanı Svisloç və İstoçyanka çaylarında tikilmiş elektron maneəni istismara qəbul edib.
2023-cü ilin yayında Polşa-Belarus sərhədinin quru hissəsində elektron maneənin quraşdırılması başa çatdırılıb. Sərhədin su hissələrində elektron maneələrin tikintisinə 2024-cü ilin fevral ayının sonunda başlanılıb.
