Ukraynanın xarici işlər naziri Dmitri Kuleba Ukrayna Prezidenti Volodimir Zelenskiyə İranla diplomatik münasibətləri kəsməyi təklif edib.
Nazir qeyd edib ki, İranın hərəkətləri alçaqlıq və yalandır, biz buna dözməyəcəyik:
“Axı İran bütün bu hərəkətləri müharibəyə qarşı olduğunu və heç bir tərəfə silahla dəstək verməyəcəyini bizə bildirdiyi bir vaxtda etdi. Ukrayna ilə münasibətlərin pozulmasına görə tam məsuliyyət Tehranın üzərinə düşür. “İranın pilotsuz təyyarələrinin Ukraynanın mülki infrastrukturunda çoxsaylı dağıntılar törətməsini, xalqımıza yaşatdığı ölüm və iztirabları, həmçinin, İranın Rusiyaya silah tədarükünün davam etməsi ilə bağlı məlumatları nəzərə alaraq mən Ukrayna Prezidentinə İranla diplomatik münasibətlərin kəsilməsinə dair təklif verirəm.
Biz heç vaxt anti-İran mövqeyi tutmamışıq. Amma İran işğalçılıq cinayətində və Rusiyanın ərazimizdə törətdiyi cinayətlərdə şərik olduqdan sonra bu gün biz çox aydın və dürüst mövqe nümayiş etdirəcəyik. Əgər İran Rusiyaya silah tədarükünü dayandırsa, biz münasibətlərin bütün spektrini bərpa etməkdən danışa bilərik”.
Ukrayna ilə İran arasındakı vəziyyətin bu həddə gəlməsinin gözlənilən olduğunu deyən siyasi şərhçi Kənan Novruzov “Sherg.az”a vurğulayıb ki, Ukrayna “Şahid” Pilotsuz Uçuş Aparatları ilə mübarizə aparmağa çalışır:
“İran XİN-i etiraf etməsə də, “Şahid” PUA larını Rusiyaya verir. Onlar hələ də təkzib edir ki, biz ruslara heçnə verməmişik. Amma faktlar göstərir ki, İran 1-2 aydır, öz PUA-larını Kremlə göndərməklə məşğuldur. Bu PUA-lar isə Ukrayna şəhərlərini dağıdaraq 100-lərlə insanın öldürür.
Bu səbəblə də əlaqələrin tamamilə kəsilməsi gözləniləndir. Bu indi olmasa belə, savaşın davam etdiyi bir neçə ay ərzində baş tutacaqdır. Bu fonda da Qərbin və Avropanın İrana sanksiyaları artacaq. Artıq KİV-lərdə belə bir fikrin formalaşması barəsində məlumatlar da yer alıb.
Analitik qeyd edib ki, ABŞ İranı da Ukraynadakı bataqlığa çəkib:
“Biz bilirik ki Qərbin 3 böyük rəqibi var. Bunlar Rusiya, Çin və İrandır. Artıq Rusiya və İran Ukrayna bataqlığına çəkilib. Növbəti hədəfin isə Çin olacağını düşünürəm. Gələcəkdəki proseslərdə rəsmi Pekinin də adı hallansa, təəccüblənmərəm".
