ABŞ Prezidenti Cozef Bayden Kubaya qarşı ticarət məhdudiyyətlərini daha bir il - 2024-cü il sentyabrın 14-dək uzadıb.
APA xəbər verir ki, bu barədə Ağ Evin mətbuat xidmətinin yaydığı bəyanatda bildirib.
"Əminəm ki, Kubaya qarşı bu tədbirlərin bir il müddətinə uzadılması ABŞ-ın maraqlarına xidmət edir", - deyə Amerika lideri bəyanatda vurğulayıb.
Qeyd edək ki, Birləşmiş Ştatlar 1961-ci ildə adadakı Amerika mülkiyyətinin milliləşdirilməsinə cavab olaraq Kuba ilə diplomatik əlaqələri kəsmiş və bundan sonra ticarət, iqtisadi embarqo elan etmişdi. 2014-cü ilin dekabrında ABŞ-ın o zamankı prezidenti Barak Obama bu siyasətin nəticə vermədiyini etiraf etmiş, ikitərəfli əlaqələrin normallaşdırılması və sanksiyaların yumşaldılması istiqamətində addımlar atmışdı. 2015-ci ildə Obama administrasiyası Kubanı ABŞ-ın terrorizmə sponsorluq edən dövlətlər siyahısından çıxarmışdı.
