ABŞ-nin hüquq-mühafizə orqanları təhlükəli fitopatogeni ölkəyə qanunsuz idxal etməyə cəhddə şübhəli bilinən iki Çin vətəndaşına qarşı cinayət işi açıb.
Oxu.Az xəbər verir ki, bu barədə "Independent" Detroytda keçirilən məhkəmə prosesinin materiallarına istinadən məlumat verib.
33 yaşlı Yuntsin Tsyan və 34 yaşlı Tsunyun Lyu bir sıra cinayətlərdə, o cümlədən qaçaqmalçılıqda, sui-qəsddə və səlahiyyətlilərə yalan məlumat verməkdə ittiham olunurlar. İstintaqın məlumatına görə, 2024-cü ilin iyulunda Detroyt hava limanında yoxlama zamanı Lyunun çantasında "Fusarium graminearum" adlı zəhərli göbələk nümunəsi aşkar edilib. Bu patogen buğda, arpa, qarğıdalı və düyü məhsullarını məhv etməyə qadirdir, həmçinin insanların və heyvanların sağlamlığı üçün təhlükə yaradır.
Prokurorluğun nümayəndəsinin sözlərinə görə, şübhəlilərin hərəkətləri ABŞ üçün ciddi təhlükə yaradıb. İstintaq müəyyən edib ki, Tsyan Miçiqan Universitetinin laboratoriyasında işləyib. Elə orada qadağan olunmuş patogenlə araşdırmaların aparılması planlaşdırılıbmış.
