“Azərbaycanla sülh sazişini imzalamaqdan və münasibətləri normallaşdırmaqdan başqa çarəmiz yoxdur".
Teleqraf xəbər verir ki, bunu ABŞ-nin “Azadlıq” radiosunun İrəvan bürosunun keçmiş rəhbəri Qraç Melkumyan deyib.
Qarabağ məsələsinin həll olunduğunu vurğulayan jurnalist bildirib ki, Ermənistanda yalançı vətənpərvər kütlə Azərbaycan və Ermənistan arasında sülh prosesini pozmaq üçün əllərindən gələni edir.
“Tanınmış sərhədləri olan Ermənistan Respublikasının qalması, münasibətlərin normallaşması və inkişafı üçün şam yandırın (Tanrıya dua edin - red.)”, - o qeyd edib.
Melkumyan ölkəsində sülhə qarşı çıxanlara xəbərdarlıq edib ki, sülhün alternativi müharibə və ya lokal toqquşmalardır:
“Bu gün onlar nə qədər Azərbaycan və Türkiyənin tələblərinin yerinə yetirilməsindən qeybət edib, prosesi gözdən salmağa çalışsalar da, geri addım atılmamalıdır. Əgər hakimiyyət həmişə ittihamlardan yayınmağa çalışacaqsa, ictimai müşahidə qrupları birbaşa deyə bilərlər ki, məğlub olan tərəf həmişə qalibin tələblərini yerinə yetirir, əksi mümkün deyil.
Sülh əleyhinə nə desələr də, ittihamlara necə don geyindirsələr də, yekun sülhün bərqərar olması, qonşularla münasibətlərin normallaşması, iqtisadi əməkdaşlığın, ticarətin alternativi yoxdur”.
