Cari ilin dekabr ayında Misir “Aləm ər-Rum” şəhəri layihəsi üzrə 3.5 milyard dollar əldə edəcək. Bundan başqa, razılaşmaya əsasən, Misir orada tikiləcək yaşayış binalarından da pay alacaq.
Trend xəbər verir ki, bunu Misirin Baş naziri Mustafa Mədbuli deyib.
Bildirilib ki, Qətər dövləti Misirin şimalında Matruh vilayətində “Aləm ər-Rum” layihəsinə təxminən 30 milyard dollar sərmayə qoyacaq. Qətərin “Diyar” şirkətinin həyata keçirdiyi layihənin ümumi sahəsi 20.5 milyon kvadratmetrdir. Burada ilin hər fəslində fəaliyyət göstərəcək müasir şəhər salınacaq, otellər, yaşayış məhəllələri, ticarət mərkəzləri, xəstəxanalar, məktəblər və universitetlər tikiləcək.
Baş nazirin sözlərinə görə, layihə çərçivəsində 250 mindən çox daimi və müvəqqəti iş yeri yaradılacaq. Eyni zamanda, Misir büdcəsinə vergilər və rüsumlardan əlavə, gəlirlər daxil olacaq. Mədbuli əlavə edib ki, 2030-cu ilə qədər ölkənin şimal sahili 17 milyon nəfəri qəbul edə biləcək imkana sahib olacaq.
Qeyd olunur ki, “Aləm ər-Rum” layihəsi Qətərin dünyadakı ən iri daşınmaz əmlak layihələrindən biri sayılır.
Digər tərəfdən Baş nazir bildirib ki, Misir gələn bazar günü beynəlxalq şirkətlərlə rabitə sahəsində 50 müqavilə imzalayacaq.
