İsrail Baş naziri Benyamin Netanyahunun Ağ Evə səfəri ərəfəsində HƏMAS tərəfindən girov saxlanılanların ailələri ABŞ Prezidenti Donald Trampa məktub ünvanlayıblar.
Axar.az xəbər verir ki, bu barədə İsrailin “Ynet” nəşri məlumat yayıb.
“Hörmətli cənab Prezident, ailələrimiz dəhşətli və ağır bir sınaqdan keçir. Sizin bu reallığı tanımağınız və yaxınlarımızı geri qaytarmaq üçün göstərdiyiniz əzm heç vaxt unudulmayacaq. Hər gün siz dünyaya xatırladırsınız ki, 48 sevdiyimizin evlərinə qayıtması və bu müharibənin birdəfəlik bitməsi vacibdir. Sizin və ABŞ-ın gücünə inanır və ona ümid edirik. Siz bunun üçün cəsarətlə çağırış etdiniz, amma biz hələ də onların azadlığı uğrunda mübarizə aparırıq”, - məktubda deyilib.
Ailələr Trampdan Netanyahunun görüşdən razılaşma olmadan qayıtmasına imkan verməməyi xahiş ediblər.
Qeyd edək ki, 2023-cü ilin oktyabrından bəri HƏMAS tərəfindən Qəzzaya aparılmış 251 nəfərdən 48-i hələ də girov saxlanılır.
