ABŞ müdafiə naziri Pit Heqset ilk dəfə Ukrayna ilə bağlı Ramştayn görüşünə qatılmayacaq, hətta videobağlantı vasitəsilə də iştirak etməyəcək.
Bu barədə “Politiko” məlumat yayıb.
“Pentaqon onun tədbirə gəlməməsini işlərinin çoxluğu ilə izah edib. Heqset Brüsselə yalnız iyunun 4-də axşam saatlarında, Ukraynanın müdafiə məsələləri üzrə təmas qrupunun iclası yekunlaşdıqdan sonra gələcək. Heqsetin qatılmamasına baxmayaraq, ABŞ-ın Avropa Komandanlığının rəhbəri Kristofer Kavoli Ramştayn tədbirində iştirak edəcək”, - qeyd olunub.
Politoloq Zeynal Əmrəliyev Sherg.az-a söyləyib ki, ABŞ-nin danışıqlardan kənara çəkilməsinin əsas səbəbi Rusiyanın mövqeyindəki uzlaşmazlıqdır:
"Artıq Tramp administrasiyası Kremlə qarşı ritorikasını sərtləşdirib. ABŞ faktiki olaraq bildirir ki, Rusiya danışıqlara hazır deyil. Həmçinin Kreml də Ağ Evin tələbləri ilə razılaşmır, o cümlədən müharibəyə davam edir. Digər tərəfdən Ramştayn görüşü çox yüksək səviyyəli deyil. Məhz ABŞ müdafiə nazirinin burada iştirak etməməsi onu göstərir ki, rəsmi Vaşinqton ümumiyyətlə prosesə qatılmaq istəmir. ABŞ-nin Avropadakı Komandanlığının rəhbərinin Ramştayn tədbirində iştirak sanki Ağ Evin məsələni AB-yə ötürdüyü görüntüsünü yaradır. Odur ki, danışıqları artıq Türkiyə və AB həyata keçirir. Rəsmi Vaşinqton da onların bu təşəbbüsünə rəsmi dəstək verir".
