Oktyabrın 12-nə keçən gecə Rusiyanın Smolensk şəhərində dron təhlükəsi səbəbindən həyəcan siqnalı verilib, daha sonra sosial şəbəkələrdə aviasiya zavodu ərazisində partlayışların olduğu barədə məlumat yayılıb.
Teleqraf "Astra" teleqram kanalına istinadən xəbər verir ki, yerli sakinlər Smolensk Aviasiya Zavodunun da yerləşdiyi aerodrom ərazisində partlayışlar olduğunu bildiriblər. "Militarnıy" nəşri qeyd edir ki, şahidlərdən birinin çəkdiyi videoda zenit raketlərinin buraxılışından sonra qalan izə bənzər bir iz görünüb.
Bundan əlavə, Bryansk vilayətinin Vyqoniçi qəsəbəsində də çoxsaylı partlayışlar qeydə alınıb, yerli elektrik yarımstansiyası hədəfə alınıb.
Qeyd edək ki, Smolensk Aviasiya Zavodu yüksək dəqiqlikli X-59 və X-101 raketlərinin komponentlərini, pilotsuz uçuş aparatlarını və döyüş aviasiyası üçün agregatları istehsal edir. Zavod Avropa İttifaqı və Ukrayna tərəfindən sanksiya siyahısına daxil edilib.
Ukrayna qüvvələri zavodu 2025-ci ilin yanvarında hücuma məruz qoymuş və istehsal prosesinə ziyan vurmuşdu.
“Financial Times”ın məlumatına görə, ABŞ bir neçə aydır ki, Ukraynaya Rusiyanın enerji və hərbi obyektlərinə zərbələr endirməsində dəstək verir. Kəşfiyyat missiyaların planlaşdırılmasına yardım edir, bu da Ukraynanın uzaqmənzilli dronlarının rus hava müdafiəsini dəf etməsinə imkan yaradır.
