Rusiya-Ukrayna münaqişəsi hələ də həll olunmamış qalır. Tərəflərin mövqeləri arasında əhəmiyyətli fərqlər mövcuddur. Aİ-nin Ali Nümayəndəsi Kallas Ukraynanın təslim olmaması gərəkdiyini bildirib. Prezident Zelenski isə Fransada səfərdədir. Eyni zamanda Trampın sülh planı üzərində danışıqlar davam edir. Bu faktlar beynəlxalq səviyyədə müxtəlif siyasətlərin və mövqelərin mövcud olduğunu göstərir. Ekspertlər qeyd edirlər ki, mümkün danışıqlar pəncərəsi yalnız gələn ilin əvvəlində və tərəflərin kompromisə hazır olduqları halda açıla bilər.
Ukraynalı beynəlxalq siyasət üzrə ekspert Maksim Yali Sherg.az-a açıqlamasında sülh razılaşmasının hələlik baş tutmayacağını söyləyib:
"Hazırkı mərhələdə, ən azı bu ilin sonuna qədər, sülh razılaşmalarının əldə olunacağını gözləmək çətin görünür. Çünki tərəflərin mövqeləri çox fərqlidir. Ukrayna Rusiyanın tələb etdiyi ərazi güzəştlərinə getməyəcək. Buna uyğun olaraq, hərbi kəşfiyyat rəhbəri Budanovun dediyi kimi, sülh üçün imkan pəncərəsi fevralda açıla bilər. Çünki Amerika Birləşmiş Ştatlarında da tezliklə Miladla bağlı fasilələr başlayacaq".
Politoloq Uitkoffun Moskvaya səfərindən hər hansı bir irəliləyiş gözləməyin çətin olduğunu qeyd edib:
"Putinin keçən həftə Qırğızıstana səfəri zamanı bir daha bəyan etdiyi kimi, o, müharibə yolu ilə məqsədlərinə nail ola biləcəyinə inanır. Razılaşma üçün imkan pəncərəsi gələn ilin yazından əvvəl açılmayacaq. Bu yalnız hər iki tərəf müəyyən kompromislərə getməyə hazır olarsa mümkün olacaq".
