Türkiyə Prezidenti Rəcəb Tayyib Ərdoğan 30 avqust Zəfər Bayramı ilə bağlı xalqa müraciət edib.
“Bu gün biz Böyük Qələbənin 100 illiyinə çatmağımızla haqlı olaraq fəxr edirik.
Millətimizi, Şimali Kipr Türk Respublikasındakı qardaşlarımızı və dünyanın hər yerində yaşayan bütün vətəndaşlarımızı 30 avqust Zəfər Bayramı münasibəti ilə təbrik edirəm.
Bayram sevincimizi bölüşən bütün dostlarımıza öz adımdan, ölkəm və millətim adından təşəkkür edirəm.
Böyük Qələbə ilə bir daha qeydə alındı ki, bu gün azad yaşadığımız torpaqlar bizim əzəli və əbədi vətənimizdir.
Türkiyə keçmişindən aldığı güclə parlaq və firavan gələcəyini qurmaq yolunda möhkəm addımlar atır.
Artan istehsal gücü, hər ay rekord qıran ixracat, müdafiə sənayesində həyata keçirdiyi layihələr və regional problemlərin həllində üzərinə götürdüyü öhdəliklərlə Türkiyə yeni dünya sistemində layiq olduğu yeri tutur.
Cümhuriyyətimizin 100-cü ildönümünü qeyd edəcəyimiz 2023-cü il, inşallah, böyük və qüdrətli Türkiyənin qurulmasının müjdəsini verəcəyimiz yeni bir mərhələ olacaq”, - deyə Türkiyə lideri bildirib.
Mənbə: Haber Global