İranın anti-Azərbaycan mövqeyi: "Yeni reallıqları həzm edə bilmir"

  “Tehranda "Mossad"ı görə bilməyən İran rejimi Zəngilanda "Mossad" axtarır”. Bunu “Sherg.az"a Milli Cəbhə Partiyasının sədr müavini, politoloq Məhəmməd Əsədullazadə deyib. Ekspert İran tərəfdən anti-Azərbaycan açıqlamaların artdığını bildirib: “Azərbaycanın uğurlu “Qisas” əməliyyatı, ordumuzun Laçın şəhəri, Zabux və Sus kəndlərinə nəzarəti bərpa etməsi İran rejimini narahat edir. Artıq Tehran prosesin Zəngəzur dəhlizinin açılması ilə başa çatacağının fərqindədir. İran rejimi Azərbaycanın öz ərazilərini işğaldan azad etməsini, daxilində separatizmə son qoymasını və regionda yeni reallıqlar yaratmasını həzm edə bilmir. Ölkəmizə qarşı xoşagəlməz və düşmən münasibətini aşkar şəkildə ortaya qoyur”.

  Analitik qeyd edib ki, cənub qonşumuzun yanlış mövqeyi regionda onun istədiyi siyasətin reallaşmasına gətirib çıxarmayacaq: “Tehrandakılar bölgədəki müsbət dəyişiklikləri ağrılarla qarşılayır. Baş verənlər İranı nə qədər narahat etsə də, bölgədə gedən prosesləri diktə edən və Cənubi Qafqazda sülhü təmin edən bizik. Bölgədə “Mossad” axtarışına çıxan İran Zəngilandakı fermanı “İsrail kəşfiyyatının obyekti” kimi qələmə verir. Tehran rəsmilərinə xatırlatmaq lazımdır ki, “Mossad” izini İranın paytaxtında axtarsınlar. Məsələn, İran prezidentinin iqamətgahı yaxınlığında nüvə alimlərinin öldürülməsini dərindən araşdırsalar, yaxşı olar. Bilirik ki, İranın “Mossad” hədyanları bəhanədir. İran sözdə ifadə etsə də, Azərbaycanın ərazi bütövlüyünün təmin olunmasını və Türkiyənin bölgədə güclənməsini həzm edə bilmir. Üstəgəl, hərbi müttəfiqlik səviyyəsinə qalxan Türkiyə-Azərbaycan əlaqələrini təşvişlə qarşılayır”.