Ermənistana verilən silahlar Azərbaycan üçün legitim hədəfdir
Ermənistanın sürətli silahlanması davam edir. Müdafiə naziri Suren Papikyanın ABŞ-dən sonra Fransaya səfəri və fransız həmkarı ilə görüşü tərəflərin hərbi əməkdaşlığının konkret konturlar aldığının göstəricisi idi. Makron hökuməti əvvəl İrəvanla hərbi təmasların müdafiə xarakterli olduğunu deyirdisə, artıq Parisin Qafqazdakı forpostuna hücum xarakterli silah ötürmək niyyətini gizlətmədiyi ortadadır.
Ötən ilə olan statistikaya inansaq, Ermənistanın Fransa ilə ticarət dövriyyəsi 160-170 milyon dollar təşkil edib. Lakin mövcud marşrutlara görə, Qərbdən silah-sursat gətirməyin əlverişli olmadığını görən Ermənistan zaman-zaman Hindistan hərbi texnikasına da göz dikir. Çünki İrəvan İran üzərindən Hindistan silahlarını rahatlıqla ölkəsinə daşıya bilir. Prezident İlham Əliyev “Rossiya Seqodnya” Beynəlxalq İnformasiya Agentliyinin Baş direktoru Dmitri Kiselyova vediyi müsahibədə də bu məsələyə xüsusi toxundu. Dövlət başçısı qeyd etdi ki, silahlanma ilə revanşa ümid edənlər 2020-ci ilin 44 günlük müharibəsini və 2023-cü ildəki antiterror əməliyyatının nəticələrini xatırlasınlar.
Beynəlxalq Münasibətlər və Diplomatik Araşdırmalar Mərkəzinin rəhbəri Samir Hümbətov "Sherg.az"a deyib ki, Azərbaycan əlbəttə ki, hansısa dövlətin Ermənistanı sürətli şəkildə silahlandırmasını gözləyə bilməz. Ekspert vurğulayıb ki, silahlanma Ermənistanın yenidən revanşist meyillərə düşməsi ilə nəticələnə bilər:
"Başa düşürük ki, Ermənistan hazırda sülhdən daha çox zamana oynayır. İrəvan hökuməti çalışır ki, Fransa, Hindistan, Yunanıstan, ABŞ kimi ölkələr ötən zaman ərzində mümkün qədər Ermənistanı silah-sursatla təchiz etsinlər. Fransanın Cənubi Qafqazdakı marağı tərəflər arasında sülhün, bölgədə sabitliyin olması yox, əksinə, münaqişənin yenidən başlamasıdır. O baxımdan cənab Prezidentin silahlanma ilə bağlı açıqlaması ilk növbədə Ermənistana, sonra isə onun himayədarlarına ciddi mesajdır. Fransa təbii olaraq bunu qəbul etmir, çünki iç üzünün ortaya çıxdığını görür. Paris Cənubi Qafqazda təxribatlarını davam etdirir. Ancaq beynəlxalq hüquqa görə hər bir dövlətin öz təhlükəsizliyini təmin etmək, özünü qorumaq hüququ var. Azərbaycan Prezidenti açıq formada Ermənistana və havadarlarına xəbərdarlıq edir ki, əgər yenidən revanşist meyillərə düşmək niyyətləri varsa, bundan vaz keçsinlər. Bu, açıq mesajdır. Ermənistana verilən silahlar Azərbaycan üçün legitim hədəfdir".
