İsrailin Qəzza zolağında sülhə məcbur edilməsi beynəlxalq ictimaiyyətin əsas vəzifələrindən biridir.
Teleqraf xəbər verir ki, bunu Türkiyənin xarici işlər naziri Hakan Fidan Dohada Qətər hökumət başçısı və xarici işlər naziri Məhəmməd bin Əbdülrəhman Al Sani ilə görüşdən sonra keçirilən mətbuat konfrasında deyib.
“İsrail sülhə məcbur edilməlidir. Beynəlxalq ictimaiyyət bu məsələdə üzərinə düşən məsuliyyəti yerinə yetirməlidir,” – nazir qeyd edib.
Türkiyə XİN rəhbəri bildirib ki, Dohadakı danışıqların əsas mövzusu Qəzzada davam edən humanitar böhran olub:
“Bütün dünyanın gözü qarşısında Qəzzada humanitar fəlakət yaşanır. Artıq iki aya yaxındır ki, bölgəyə humanitar yardım çatdırılmır,” – o vurğulayıb.
Hakan Fidan əlavə edib ki, hazırda əsas vəzifələr atəşkəs rejiminin dərhal bərpası, humanitar yardımın fasiləsiz şəkildə Qəzzaya çatdırılması və əsirlərin qarşılıqlı mübadiləsinin təmin edilməsidir.
Nazir həmçinin bildirib ki, Fələstin probleminin həlli yalnız iki dövlət prinsipi əsasında mümkündür.
