Asim Mollazadə: Erməni diasporasının istəkləri bu yollarla Fransa hökumətinə sırınır
İyulun 22-də Fransa Milli Assambleyasındakı “Sağ Respublikaçılar” qrupunun rəhbəri və Fransa-Ermənistan dostluq qrupunun sədri Loran Vokye (Laurent Wauquiez), habelə həmin dostluq qrupunun sədr müavini Aleksandr Marten (Alexandra Martın) tərəfindən “Ermənistanla strateji tərəfdaşlığı imzalamaqla onu Azərbaycanla sülh səylərində dəstəkləmək və Azərbaycanda saxlanılan Artsax siyasi məhbuslarının azad edilməsinə tələb etmək məqsədini daşıyan” Avropa Qətnaməsi təşəbbüsünü irəli sürüblər.
Qətnamədə Azərbaycan tərəfindən saxlanılan “siyasi məhbuslar olan erməni hərbi, siyasi və mülki şəxslər” üzərində keçirilən məhkəmə proseslərinin guya “qondarma” olduğu iddia edilir, onların dərhal azad olunması tələbi irəli sürülür. Bundan əlavə, Azərbaycanın Ermənistanın mövcudluğunu inkar etdiyi, bunun Azərbaycanın Artsaxda və digər nəzarət etdiyi bütün ərazilərdə erməni əhalisini məhv etmək siyasətinin davamı olduğu vurğulanır. Həmçinin, Azərbaycanın dini, mədəni və tarixi irsi məhv etdiyi bildirilir.
Təsadüfi deyil ki, Prezident İlham Əliyevə qarşı nifrət halına çevrilmiş paxıllığını cilovlaya bilməyən Emmanuel Makron, balaca paxıl uşaqlar kimi güclü, qüdrətli və qalib siyasi lider, xalqının dəstəyini qazanmış Prezident İlham Əliyevə nəticəsiz “pisliklər” etməyə çalışır. Unutmaq olmaz ki, Yeni Kaledoniyada Azərbaycan bayraqları dalğalanır. İndi Fransanın müstəmləkə altında saxladığı ölkələrin insanları Azərbaycana müqəddəs “Məkkə”, “Vatikan” kimi baxırlar və dekolonizasiya prosesinin mərkəzi kimi qəbul edirlər. Azərbaycan bundan sonra da Fransa hakimiyyətinin real simasını dünyaya göstərməkdə davam edəcək, işğal altında olan dənizaşırı ərazilərin müstəqillik uğrunda mübarizəsini dəstəkləyəcək.
Milli Məclisin deputatı Asim Mollazadə Sherg.az-a bildirib ki, Fransada həyata keçirilən siyasətin arxasında zəngin və təşkilatlanmış erməni diasporası dayanır:
"Onlar korrupsiyaya bulaşmış bir sıra Fransa siyasətçilərini öz təsiri altında saxlayırlar. Diasporanın məqsədi aydındır: onlar təşviş içindədirlər. Qorxurlar ki, Cənubi Qafqazda sülh və əməkdaşlıq bərqərar olarsa, Azərbaycan-Ermənistan, eləcə də Ankara-İrəvan münasibətləri normallaşarsa, “soyqırımı” planları və bu bəhanə ilə maliyyə toplamaq imkanları puç olacaq. Buna görə də Fransa Ermənistandakı revanşist əhval-ruhiyyəni gücləndirmək, ölkəni yenidən müharibəyə sürükləmək istəyir. Bu siyasətçilərin əsas məqsədi Cənubi Qafqazda yeni münaqişələrin yaradılması və Ermənistanın daha da dərin problemlərlə üz-üzə qalmasıdır. Guya “soyqırımı” iddialarının davam etdirilməsi onların xəstə təfəkküründə həm mənəvi, həm də maddi qazanc mənbəyidir. Fransada korrupsiyaya bulaşmış siyasətçilərin, xüsusilə də seçki dövrlərində bu cür təsirlərə daha çox meyilli olması faktdır. Erməni diasporasının istəkləri bu yollarla Fransa hökumətinə sırınır".
Deputat vurğulayıb ki, Yeni Kaledoniyada məsələsi isə bunun bir başqa təzahürüdür:
"Azərbaycan bu məsələdə yalnız Yeni Kaledoniya ilə məhdudlaşmır. Məqsəd ümumilikdə imperialist siyasətlərə son qoymaq və müstəmləkə xalqlarının azad yaşamaq hüququnu dəstəkləməkdir. Azərbaycan Prezidenti İlham Əliyev bunu bir çox beynəlxalq tribunalarda, forumlarda və Qoşulmama Hərəkatının platformasında açıq şəkildə bəyan edib. Məqsəd sadədir: imperializmə son qoyulmalıdır".
