ABŞ Prezidenti Donald Tramp İranla davam edən müzakirələr fonunda əvvəlki mövqeyindən fərqli olaraq, münasibətləri daha sakit və diqqət çəkmədən davam etdirməyə üstünlük verdiklərini bildirib.
ABŞ-ın İranla bağlı strategiyasını dəyişdirdiyi görünür.
Tramp İranla yaşanan siyasi və hərbi böhranla bağlı ABŞ-ın “Axios” xəbər saytına müsahibə verib. “Axios”un məlumatına görə, ABŞ Prezidenti qısa telefon danışığı zamanı İran üzərində iqtisadi təzyiqi artırmağa hazır olduqlarına dair mesaj verib.
Nəşr Trampın bu mövqeyinin İrana qarşı yeni hücum dalğasına başlamaq ehtimalından fərqli bir yanaşmaya işarə etdiyini qeyd edib.
Tramp İranla təmasların “çox böyüdülmədən” davam etdirildiyini bildirib.
“Onlarla yarımçıq bir danışıqlar prosesindəyik. Sadəcə yüksək inflyasiyalarını və pullarının tükəndiyini müşahidə edirik”, – deyə Tramp bildirib.
Tramp: İranın iqtisadi vəziyyəti çox pisdir
ABŞ Prezidenti İranın iqtisadi baxımdan çox ağır vəziyyətdə olduğunu iddia edib. Onun sözlərinə görə, Tehran rəhbərliyinin hərbçilərinə maaş ödəmək üçün kifayət qədər vəsaiti yoxdur.
Tramp ABŞ-ın İran istiqamətində tətbiq etdiyi dəniz blokadasının ölkədəki iqtisadi böhranı daha da dərinləşdirdiyini bildirib.
ABŞ Prezidenti həmçinin xam neftin bir barelinin qiymətinin 75 dollardan bir qədər yuxarı olduğunu qeyd edib. O, bunun müharibənin ABŞ istehlakçılarına təsirinin daha az hiss olunmasına səbəb olduğunu söyləyib.
İranla danışıqların hazırkı vəziyyətini də qiymətləndirən Tramp deyib:
“Hər şey yoluna düşəcək. Hər şey həmişə yoluna düşür. Bu, şahmat oyunu kimidir.”
İran və Oman arasında Hörmüz boğazı ilə bağlı danışıqlar
İran Xarici İşlər Nazirliyi bir neçə gün əvvəl Omanla Hörmüz boğazında təhlükəsiz dəniz nəqliyyatının təmin olunması ilə bağlı aparılan danışıqların son mərhələyə çatdığını açıqlayıb.
Nazirlik tərəflərin yaxın zamanda birgə bəyanat yayımlaya biləcəyini bildirib.
İran Milli Təhlükəsizlik Ali Şurasının baş katibi Məhəmməd Bağır Zülqədir isə Hörmüz boğazının yenidən açılması üçün ABŞ-ın “davranışını düzəltməli” olduğunu deyib.
Zülqədir ABŞ-dan İrana və onun “müqəddəs dəyərlərinə” qarşı təhdidlərə son qoymağı, İran və onun regional müttəfiqlərinə qarşı hərbi əməliyyatları dayandırmağı tələb edib.
O, həmçinin İran ətrafındakı blokadada iştirak edən ABŞ-ın dəniz və hava qüvvələrinin geri çəkilməsini, son qarşıdurma zamanı İrana dəymiş zərərə görə təzminat ödənilməsini, İrana qarşı sanksiyaların ləğv edilməsini və İranın dondurulmuş aktivlərinin azad olunmasını istəyib.
Beləliklə, Vaşinqtonun hazırkı yanaşması hərbi eskalasiyadan daha çox iqtisadi təzyiq və danışıqlar yolu ilə İranı güzəştlərə məcbur etmək strategiyasına yönəlmiş kimi görünür.
