İsrailin Calcalist nəşrində yayımlanan təhlildə Türkiyə, Səudiyyə Ərəbistanı və Pakistan arasında imzalanan “Məkkə Müdafiə Anlaşması”nın Türkiyə üçün müdafiə sənayesi, ixrac və investisiyalar baxımından mühüm imkanlar yarada biləcəyi bildirilir.
Anlaşmaya əsasən, üç ölkədən birinə qarşı silahlı hücum digər ölkələrə qarşı da hücum kimi qiymətləndiriləcək. Bununla yanaşı, müdafiə sahəsində əməkdaşlığın bütün istiqamətlər üzrə dərinləşdirilməsi nəzərdə tutulur. Prezident Rəcəb Tayyib Ərdoğanın anlaşmanın birgə müdafiə sənayesi layihələrinə yol açmalı olduğunu bildirməsi Türkiyənin sənədi yalnız təhlükəsizlik deyil, həm də müdafiə ixracının və gəlirlərinin artırılması baxımından strateji platforma kimi gördüyünü göstərir.
Təhlildə qeyd olunur ki, Türkiyənin müdafiə və aviasiya sənayesi ixracı 2025-ci ildə 48 faiz artaraq 10,05 milyard dollara çatıb. Səudiyyə Ərəbistanının isə Türkiyənin sınaqdan keçirilmiş müdafiə sistemlərinə, rəqabətqabiliyyətli qiymətlərə, texnologiya transferinə və ölkə daxilində istehsala ehtiyacı var. Bu əməkdaşlıq Ər-Riyadın “2030 Vizyonu” çərçivəsində müdafiə sənayesinin lokallaşdırılması hədəfi ilə də uyğunlaşır.
Türkiyə ilə Səudiyyə Ərəbistanı arasında müdafiə əməkdaşlığının artıq mövcud olduğu, Baykarın pilotsuz uçuş aparatlarının satışı və Roketsanın Səudiyyə Ərəbistanında yerli istehsal və təchizat imkanlarının inkişafı ilə bağlı razılaşmalarının buna nümunə olduğu vurğulanır.
Təhlilə görə, üç ölkənin imkanları bir-birini tamamlayır: Səudiyyə Ərəbistanı kapital və böyük müdafiə bazarı, Pakistan hərbi potensial, Türkiyə isə müdafiə məhsullarını istehsal edə bilən sənaye infrastrukturu təqdim edir.
Bu səbəbdən, anlaşmanın konkret birgə layihələrə çevriləcəyi təqdirdə Türkiyənin ittifaqın ən böyük iqtisadi qazanan tərəfi ola biləcəyi bildirilir. Anlaşmanın gələcək illərdə Türkiyənin müdafiə sənayesi ixracı, ticarət və investisiyalarının əsas hərəkətverici qüvvələrindən birinə çevrilə biləcəyi qeyd olunur.
