Politoloq: “Trampın Rusiyaya yönəlik yumşaq yanaşması taktiki gedişdir"
ABŞ Prezidenti Donald Trampın Kremldən atəşkəs tələb etməməsi və sanksiya təzyiqindən əl çəkmək qərarı fəlakətli səhvdir.
Bunu ABŞ ordusunun Avropadakı keçmiş komandanı, general Ben Hoces deyib.
“Belə bir mövqe Trampa etimadı ciddi şəkildə sarsıdacaq və ABŞ üçün alçaldıcı olacaq. Amerika bunu təkbaşına edə bilməz, bizə müttəfiqlər lazımdır və onların ən yaxşısı Avropada, Kanadada və Avstraliyadadır. ABŞ desə ki, bu, yalnız Avropanın problemidir, məncə, bu, onilliklər ərzində bizim tərəfimizdə olan müttəfiqlərimizə xəyanət olacaq”, - Hoces bildirib.
Politoloq Taleh Əliyev Sherg.az-a deyib ki, Donald Trampın Rusiya ilə yumşaq siyasəti Moskvanı strateji qərarlardan çəkindirmək funksiyasını daşıyır:
"ABŞ Rusiya-Ukrayna müharibəsində nə qədər yumşaq davransa da, onun avropalı müttəfiqləri - Böyük Britaniya başda olmaqla, Fransa, Almaniya, Polşa və digər Avropa strukturları Moskvaya qarşı hərzamankı mövqeyini ortaya qoyur. Rusiyanın təkbaşına Avropa Birliyinin üzərində qələbə çalması mümkünsüzdür. Əslində ABŞ-nin Tramp hakimiyyəti timsalında Kremllə münasibətlərinin yumşaldılması Rusiyanı daha sərt qərarlardan çəkindirməkdən başqa bir şey deyil. Ona görə də Ağ Evin hazırkı siyasəti Moskva üçün yeni imkanlar yaratmır. Əksinə, Rusiyanı müharibədə Avropa qarşısında daha da tərksilah vəziyyətinə gətirir. Çünki Avropanın ən kiçik dövlətləri Ukraynaya 20-dən çox milyardlarla qiyməti olan hərbi paketlərini təqdim edirlər".
Politoloqun sözlərinə görə, kənardan parçalanmış kimi görünsə də, ABŞ və Avropa Birliyi birlikdədir. Onların məqsədi nüvə silahı istehsal etmədən müharibədə Rusiyanı məğlub etməkdən ibarətdir.
