Abşeronda kişi arvadını “TikTok” sosial şəbəkəsindən istifadə etdiyinə görə döyüb.
“Report”un əldə etdiyi məlumat görə, bu barədə Abşeron Rayon Məhkəməsində keçirilən məhkəmə istintaqında elan olunub.
İttiham aktına əsasən, hadisə Abşeron rayonu, Hökməli qəsəbəsində qeydə alınıb.
Belə ki, 1987-ci il təvəllüdlü V.X. həyat yoldaşı L.X. ilə mübahisə edib. Mübahisəyə səbəb isə qadının “TikTok” sosial şəbəkəsindən istifadə etməsi olub.
Daha sonra o, arvadının başına və bədəninin müxtəlif nahiyəsinə yumruqla vurub.
Qadının şikayətindən sonra V.X. saxlanılıb və onun barəsində Cinayət Məcəlləsinin 128-ci (Qəsdən sağlamlığa yüngül zərər vurma) maddəsi ilə ittiham irəli sürülüb.
İstintaq dövründə təqsirləndirilən şəxs barəsində qətimkan tədbiri seçilməyib.
Məhkəmədə elan edilib ki, hazırda tərəflər barışıb, zərərçəkmişin V.X.-ya qarşı heç bir şikayəti və tələbi yoxdur. O, məhkəmədən işin xitam olunmasını xahiş edib.
Abşeron Rayon Məhkəməsinin hökmü ilə icraata xitam verilib və V.X. cinayət məsuliyyətindən azad olunub.