Macarıstana qarşı sanksiyalar Avropanın ikili standartlarını üzə çıxarır
Avropa İttifaqı (Aİ) Şurası mayın 27-də Macarıstanın səsvermə hüququndan məhrum edilməsi imkanı ilə bağlı dinləmə keçirəcək.
Bu barədə qurumun rəsmi saytında məlumat yayılıb.
Məlumata görə, Aİ haqqında Müqavilənin 7-ci maddəsi pozucu kimi tanınmış üzv dövlətin müəyyən hüquqlarının dayandırılması prosedurunu nəzərdə tutur.
Avropa Parlamentinin 26 deputatı isə rəsmi Brüsselə məktub ünvanlayaraq, Macarıstana ayrılan maliyyələşdirmənin dondurulmasını istəyiblər. Buna səbəb kimi ölkədə azadlıqların məhdudlaşdırılması, demokratiyanın sarsıdılması, eləcə də Avropa İttifaqının qanunvericiliyinə və dəyərlərinə riayət edilməməsi göstərilib.
Baş nazir Viktor Orbanın rəhbərlik etdiyi Macarıstan hökumətinin Aİ ilə münaqişələr səbəbindən artıq bir neçə milyard avrodan məhrum olduğu bildirilir. Əsas səbəblər kimi sığınacaq axtaranlarla davranış qaydalarının pozulması və korrupsiya şübhələri göstərilir.
Politoloq İlqar Vəlizadə Sherg.az-a söyləyib ki, Aİ artıq öz səlahiyyətlərini aşır:
"Bu gün Avropa dövlətlərinin qanunları pozulursa, sonra digər ölkələrdə də eyni mexanizmdən istifadə oluna bilər. Macarıstanın tutduğu müstəqil mövqe bir çox dairələri narahat edir. Buna görə də onlar öz etirazlarını açıq şəkildə bildirirlər. Eyni zamanda müxtəlif ölkələr ötən ildən bəri Macarıstana qarşı təzyiqlər göstərməyə cəhd edirlər. Lakin nəticə etibarilə bütün bunların heç bir əhəmiyyəti olmayıb. Hazırda isə Macarıstanı səsvermə hüququndan məhrum edilməsi yoluna əl atırlar. Hadisələr onu göstərir ki, Aİ rəhblərliyi demokratik anlayışlardan uzaqlaşır. Beləliklə Avropa siyasi cəhətdən öz "cazibədarlığını" itirir. Odur ki, bərabərhüquqlu davranışlar, bir-birinin fikirlərinə hörmət yerinə, total nəzarət prinsipi hökm sürür".
