Türkiyə Prezidenti Rəcəb Tayyib Ərdoğan ABŞ Prezidenti Donald Trampla keçən ay baş tutan görüşünün "F-35" təyyarələrinin Türkiyəyə satılmasına qoyulan sanksiyaların ləğvinə kömək edəcəyinə ümidini ifadə edib.
Teleqraf xəbər verir ki, Tramp və Ərdoğanın iki həftə əvvəl Ağ Evdə apardıqları danışıqların əsas mövzuları ABŞ-ın 2020-ci ildə Rusiyadan S-400 hava hücumundan müdafiə sistemləri aldığına görə Türkiyəyə tətbiq etdiyi sanksiyalar və "Halkbank"ın İrana müəyyən sanksiyalardan yayınmağa kömək etməsi olub.
Lakin görüşdən sonra tərəflər bu məsələlərlə bağlı hər hansı razılıq əldə etdiklərini açıqlamayıblar.
"Ümid edirəm ki, "F-35" məsələsi həll olunacaq və sanksiyalar aradan qaldırılacaq. Biz buna nail olmalıyıq. Səfərimiz Türkiyə-Amerika münasibətlərində yeni dövr açdı və aramızdakı dialoqu və dostluğu daha da gücləndirdi", - Ərdoğan cümə axşamı deyib.
Türkiyə prezidenti “Halkbank”la bağlı vəziyyəti xüsusi qeyd edib: "Həm Ağ Evdə olarkən, həm də telefon danışığı zamanı Tramp bankla bağlı probleminin həll edildiyini deyib".
