Sosial şəbəkələrdə evini hostelə çevirən şəkili vətəndaşla bağlı video yayılıb. Əfqan Abidov adlı həmin şəxs 4 ildir ki, evindən bu məqsədlə istifadə edir. O, turizmin əvvəllər gəlirli bir sahə kimi perspektivi olduğunu vurğulayıb. Sonradan işlər yaxşı getməyib. Gileylənir ki, artıq turist yoxdur. Gələnlər də öz vətəndaşlarımız olur. Onlar da nadir halda gəlir. Ə.Abidov bunu ölkədəki pandemiya şəraiti ilə əlaqələndirib.
Həmin videoya gələn rəylər isə, fərqli olub. İnsanlar hostel sahibini günahlandırıblar. Onlar qiymətlərin baha olmağından şikayətləniblər.
Bütün dünyada otellərin baha olmasına görə hostel seçimi avantajlı görünür. Ancaq ölkədə turistlərin marağını daha çox cəlb edən hostellər demək olar ki, yoxdur. Paytaxtda və bölgələrdə əsasən 4-5 ulduzlu hotellər fəaliyyət göstərir ki, burda da qiymətlər çox bahadır. Sahibkarlar bu sistemlə bağlı düzgün standarlar qura bilmir.
Ümumiyyətlə, bu cür turizm sistemi nə dərəcədə doğrudur? Hansı addımlar atılmalıdır?
Məsələ ilə bağlı “Sherg.az”a münasibət bildirən iqtisadçı Natiq Cəfərli Azərbaycanda turizm obyektlərinin sayının az olmasından bəhs edib:
“Nə qədər qəribə səslənsə də, hər dəfə yeni bir hotel açılanda çox olduğu düşünülür. Amma onların da sayı nəzərəçarpacaq qədər deyil. "HomeOtel" konsepsiyası azdır. İki və üç ulduzlu otellərin də sayı azdır. Ona görə də, qiymətlər bahadır. Bu rəqabətlə bağlıdır. Əgər rəqabət güclənərsə, həm hostellərin, həm “HomeOtel”lərin açılması prosesi genişlənərsə, o zaman qiymətlər də düşəcək".
İqtisadçı pandemiya ilə bağlı turizmin ləngidiyini də qeyd edib:
“Quru sərhədlər bağlı olduğu üçün turizmlə bağlı problemlər qalmaqdadır. Onsuz, turistlərin sayı azdır. Ona görə, tələbat yoxdur. Həm də belə bir şərait də yoxdur. Nə vaxtsa, bu virusdan xilas olub, sərhədlər tamamilə açılsa, gələcəkdə ölkədə hostel, “HomeOtel” və yaxud kiçik hotel sisteminə yenidən baxmaq lazım gələcək. Doğrudan da, indi müasir turist artıq baha hotellərdə qalmaq istəmir. Daha sadə, ucuz və təmiz hotellərdə qalmağa üstünlük verir”.
Cəmilə ƏZİM
