Aİ-nin yeni sanksiyalar paketi Rusiya neftinin qiymətini kəskin şəkildə aşağı sala bilər.
APA xəbər verir ki, bu barədə “Financial Times” mənbələrə istinadən məlumat yayıb.
Bildirilib ki, Avropa Komissiyası aparıcı Avropa ölkələrinin, o cümlədən Fransa, Almaniya və İtaliyanın dəstəyi ilə Rusiya neftinin qiymətinin bir barel üçün tavanını 60 dollardan 45 dollara endirməklə Rusiyaya qarşı sanksiyaları sərtləşdirmək istəyir.
Bu məhdudiyyətlərin Aİ-nin Rusiyaya qarşı 18-ci sanksiyalar paketi çərçivəsində nəzərdən keçirildiyi vurğulanıb.
Qeyd edək ki, mayın 20-də Aİ Şurası Rusiyaya qarşı 17-ci sanksiyalar paketini təsdiqləyib.
Aİ xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallas Rusiyaya qarşı 18-ci sanksiyalar paketinə hazırlıqlara başlanıldığını açıqlayıb.
Millət vəkili Vüqar Bayramov “Sherg.az”a söyləyib ki, qlobal neft bazarında son dövrlər volatillik müşahidə edirik:
“Volatillik neftin dünya bazar qiymətində azalmalarda özünü göstərir. Əslində Avropa İttifaqı tərəfindən müəyyənləşdirilmiş tavan həm də nisbi xarakter daşıyır. Amma bu heç də qlobal bazarda Rusiya Ukrayna müharibəsi başladıqdan sonra neftin kəskin qiymət azalmalarında müşahidə olunmadı. Yalnız 2025-ci ildən başlayaraq biz neftin qiymətində azalmalar müşahidə edirik. Bunun da səbəblərindən biri yalnız tələb təklif deyil, həm də neft bazarındakı siyasi müdaxilələrdir. Amma bütün hallarda neftin dünyadakı bazar qiyməti ilə bağlı fərqli proqnozlar var. Bəzi beynəlxalq təşkilatlar bədbin proqnozlar irəli sürürlər, bəziləri tərəfindən isə qiymətin məhz 60-65 dollar arasında dəyişəcəyi proqnozlaşdırılır. Neft ölkəsi olaraq Azərbaycan üçün iqtisadiyyatın diversifikasiyası ilə bağlı islahatların dərinləşməsi və xüsusən də qeyri neft sektorunun inkişafı ilə bağlı proqram və layihələrinin sayının daha da artırılması prioritetdir. Milli prioritetlərdə də məhz bu istiqamət olaraq müəyyənləşib. Son dövrlər biz iqtisadiyyatın daha çox ağarmasını, şəffaflığın artması və qeyri neft sektorunun ÜDM dəki payının yüksəlməsini müşahidə edirik. Bu da ondan xəbər verir ki, xüsusən də qlobal neft bazarındakı çağırışlara, Azərbaycan iqtisadiyyatı diversifikasiya imkanlarını genişləndirməklə reaksiya verməyə və mövcud iqtisadi artım tempinin qorunub saxlanması və iqtisadi dayanıqlığın qorunmasına çalışır. Son illərin təcrübəsi göstərir ki, Azərbaycanın mövcud potensialı neft bazarındakı dəyişikliklərə reaksiya vermək gücündədir”.
