Türkiyənin Ordu şəhərində fındıq istehsalı ilə məşğul olan Kemal Demirbaş (50) məhsul yığımında tanış olduğu qarğa ilə qurduğu bağ görənləri təəccübləndirir.
Sherg.az xəbər verir ki, “Şakir” adını verdiyi qarğa hər gün onun evinə gəlir və birlikdə vaxt keçirirlər. Məhəllənin simvolu halına gələn Şakir ən çox pendir və yağlı balıq sevir.
Hadisə belə başlayıb. Bağında təxminən 2 ay əvvəl fındıq yığarkən Kemal Demirbaşın yanına bir qarğa yaxınlaşıb. Qarğaya fındıq verən və bir müddət onunla maraqlanan Demirbaş qeyd edib ki, quş bir daha yanından ayrılmayıb.
“Qarğaya ‘Şakir’ adını verdim. Təxminən 2 ay əvvəl bağda fındıq yığarkən yanıma gəldi. Ona fındıq verdim. Bağda bizimlə vaxt keçirdikdən sonra bizi evə qədər izlədi. Sonra da bir daha yanımızdan ayrılmadı. Mənim iki oğlum var, Şakir də üçüncü oğlum oldu. Ona uşağım kimi baxıram,” – deyə Demirbaş bildirib.
Şakir ən çox pendir və balıq yeməyi sevir. Qarnını doyurduqdan sonra məhəllədə uçur və yenidən evə qayıdır. Məhəllə sakinləri də onu çox sevir. Normalda qarğalar vəhşi quşlardır və insanlara çox yaxınlaşmırlar. Amma Şakir digərlərindən fərqlidir. Məhəllədə hər kəs ona yemək verir. Məhəllənin simvolu olub və hər kəs onu sevir, amma Şakir ən çox məni sevir. Mən onu çağıranda dərhal yanıma gəlir. Çox ağıllı bir heyvandır. Hazırda aramız çox yaxşıdır. Arvadım və uşaqlarım da Şakirə çox alışıb. İnşallah bir gün özünə yoldaş tapıb bizi tərk etməz. Onu çox sevirik. Gedərsə, kədərlənərik,” - deyə Demirbaş sözlərinə əlavə edib.
