Görünür, birinci variantı tərtib edən kimdirsə və yaxud hansı qüvvəni təmsil edirsə, Türkiyə və Azərbaycana qarşı fobiyası var
Avropa İttifaqının (Aİ) Ermənistandakı missiyası qondarma “erməni soyqırımı” ilə bağlı qeydləri silib. Qeydlər Missiyanın X sosial şəbəkəsindəki rəsmi səhifəsindən silinib. Belə ki, əvvəl qondarma “erməni soyqırımı qurbanlarının xatirəsini ehtiramla yad edirik” ifadəsi yer alsa da, sonradan bu, “1915-1923-cü illər qurbanlarının xatirəsinə” ifadəsi ilə əvəz edilib. Görünür, Avropa İttifaqının Ermənistandakı Mülki Missiyası rəsmi Ermənistan və erməni lobbisinin tarixi saxtalaşdırmaqla apardığı ideoloji təbliğatda iştirak edir.
Araşdırmaçı-jurnalist Asəf Quliyev “Sherg.az”a açıqlamasında bildirib ki, istər Avropa İttifaqı olsun, istərsə də hər hansısa başqa bir dövlət və yaxud hansısa beynəlxalq təşkilat belə məsələlərdə münasibət bildirərkən siyasi konyukturanı mütləq nəzərə alırlar:
“Bu məsələdə həm birinci variant, həm də redaktə olunmuş ikinci variant siyasi maraqlardan irəli gəlir. Avropa İttifaqının monolit olmadığı artıq sirr deyil. Görünür, birinci variantı tərtib edən kimdirsə və yaxud hansı qüvvəni təmsil edirsə, Türkiyə və Azərbaycana qarşı fobiyası var. Bu materialın redaktəsini təmin edən isə kimdirsə və yaxud hansı qüvvədirsə, anlayır ki, bu gün Avropanın Türkiyəyə və Azərbaycana daha çox ehtiyacı var, nəinki Ermənistana. Məncə, məsələyə bu prizmadan baxmaq və dəyərləndirmək lazımdır. Həm dünyada, həm Avropada, həm Qafqaz regionunda yaranmış situasiya Avropanın Qafqaza münasibətinin əsas meyarıdır. Və ağlı başında olan Avropa bürokratı Türkiyə və Azərbaycanın nə dərəcədə gərəkli tərəfdaş olduğunu anlayır. Amma ortada dünyanın, Avropanın maraqlarını yox, özəl maraqlarını təmin etməyə çalışan qüvvələr də olub, var və yəqin ki, bundan sonra da olacaq. Bu isə o deməkdir ki, belə hallarla müxtəlif situasiyalarda qarşılaşa bilərik”.
