Özbəkistanın maliyyə bazarında yeni istiqamətin - İslam bankçılığı sisteminin tətbiqi məsələsi gündəm məsələsinə çevrilib.
Teleqraf xəbər verir ki, bu barədə Özbəkistan KİV məlumat yayıb.
Sentyabrın 16-da parlamentin Qanunvericilik Palatası məsələni müzakirə edib və parlament üzvlərinə xüsusi qanun layihəsi təqdim olunub.
Mərkəzi Bankın sədr müavini Abrorxoca Turdəliyevin sözlərinə görə, ölkədə islam bankçılığı üçün ayrıca lisenziyanın tətbiqi nəzərdə tutulur. Buna əsasən, banklar İslam bankları kimi müstəqil fəaliyyət göstərə və ya islami xidmətlərlə mövcud bankların tərkibində xüsusi şöbə yarada biləcəklər.
Layihə şəriət qanunlarına uyğun olaraq əhaliyə və sahibkarlıq subyektlərinə maliyyə xidmətləri göstərəcək. Rəsmilərin fikrincə, bu təşəbbüs banklar arasında rəqabəti artıracaq, bazara yeni investorlar cəlb edəcək, maliyyə xidmətlərinin keyfiyyətini yüksəldəcək.
Qanun layihəsi bir sıra hüquqi aktlara əlavə və dəyişiklikləri nəzərdə tutur.
Qeyd edək ki, ondan çox bankda “İslam pəncərələri”nin yaradılması üzrə işlərə 2022-ci ildə başlanılıb. Prezident Şavkat Mirziyoyev bildirib ki, İslam bankçılığının tətbiqi ölkəyə təxminən 5 milyard dollarlıq əlavə resurslar cəlb edə, maliyyə bazarında rəqabət mühitini əhəmiyyətli dərəcədə yaxşılaşdıra bilər.
