İran nüvə silahı əldə etmək niyyətində deyil.
Bunu İran Prezidenti Məsud Pezeşkian “Əl-Cəzirə” telekanalına müsahibəsində deyib.
“Biz nüvə silahına malik olmaq imkanını tamamilə rədd edirik, bu, bizim siyasi, dini, humanitar və strateji mövqeyimizdir”, – Pezeşkian qeyd edib.
O vurğulayıb ki, İran beynəlxalq hüquq çərçivəsində gələcəkdə öz ərazisində uranı zənginləşdirməyə davam edəcək.
Politoloq Sədrəddin Soltan Sherg.az-a deyib ki, İran tərəfi 12 günlük müharibə zamanı bu ölkənin nüvə proqramının hərbi mahiyyətli olmadığının təsdiqlənndiyini bəyan edib:
"Tehran bununla bildirmək istəyir ki, əgər onlar nüvə silahı, yaxud kütləvi qırğın silahlarına malik olsaydılar, bundan İsrailə və müttəfiqlərinə qarşı istifadə edərdilər. Yəni qeyd edirlər ki, Ayətullah Seyid Əli Xameneinin fətvası ilə ölkədə nüvə silahı və kütləvi qırğın silahı hazırlanmır.
İran rəsmiləri vurğulayır ki, nüvə proqramı onların milli qürur mənbəyidir, elmi nailiyyətidir və onlar uranın zənginləşdirilməsindən imtina etməyəcəklər. Həmçinin qeyd olunur ki, on iki günlük müharibədən sonra uranın zənginləşdirilməsi istiqamətində heç bir addım atılmayıb. Bununla yanaşı, İran rəsmiləri bəyan edir ki, ABŞ-ın iyunun 22-də endirdiyi hava zərbələri nəticəsində nüvə obyektləri ciddi zərər görüb. Bu baxımdan İran nüvə proqramını inkişaf etdirməsini və nüvə enerjisindən sülh məqsədilə istifadə etməsini problem olaraq görmür".
Analitik əlavə edib ki, İran hakimiyyətinə nüvə sazişi ilə bağlı, yəni nüvə proqramından imtina etmək öhdəliyini qəbul etməsi üçün avqustun sonuna qədər möhlət verilib:
"Bu barədə Avropa üçlüyü — Böyük Britaniya, Almaniya və Fransa bəyanat verib. Bu müddət ərzində İran rəsmiləri ilə Avropa üçlüyünün nümayəndələri arasında görüşlər keçiriləcək. İyulun 25-dən 28-nə qədər İstanbulda belə bir görüşün keçirilməsi planlaşdırılır. İran hakimiyyəti bu görüşə qatılmamışdan əvvəl Rusiya və Çin kimi tərəfdaşları ilə həm nüvə sazişi məsələsini, həm də perspektivdə İrana qarşı ehtimal olunan hücumların qarşısını almaq yollarını müzakirə ediblər. İyulun 22-si Tehranda belə bir görüş baş tutub və növbəti müzakirələrin keçirilməsi barədə razılıq əldə olunub.
Ola bilər ki, bu yeni görüş İstanbulda keçiriləcək tədbirdən sonra baş tutsun. Hələlik Tehran hakimiyyəti nüvə proqramından geri çəkilmək niyyətində deyil".
