Havanın həddindən artıq istiləşdiyi son günlərdə mütəxəssislər günvurma təhlükəsinə qarşı əhaliyə ciddi xəbərdarlıq ediblər. Onlar bildiriblər ki, yüksək temperatur təkcə xəstələr deyil, sağlam insanlar üçün də beyin qanaması və infarkt kimi həyati risklər yarada bilər.
Sherg.az mütəxəssislərə istinadən vurğulayır ki, bədəndə su itkisi artdıqca elektrolit balansı pozulur, bu isə ürək-damar sisteminə mənfi təsir göstərir. Ona görə də gündə ən azı 2–2,5 litr su içilməsi tövsiyə olunur, əgər maye məhdudiyyəti tələb edən bir xəstəlik yoxdursa.
Xüsusilə saat 11:00–16:00 arası birbaşa günəş altında olmaqdan çəkinmək lazımdır. Çölə çıxanlar isə kölgədə qalmalı, şapka taxmalı, əl, üz, boyun və qollarını su ilə tez-tez islatmalıdırlar. Evə dönəndə isə ilıq duş bədənin istiliyini tənzimləməyə kömək edir.
Hipertoniya, şəkərli diabet və ürək xəstəliyi olan şəxslər üçün bu cür istilər daha böyük təhlükə yaradır. Mütəxəssislər belə şəxslərin sıx nəzarət altında olması və günəşə məruz qalmamaq üçün tədbirlər görmələri lazım olduğunu bildirirlər.
