2024-cü ildə ölkə əhalisinin 50 faizdən çoxu icbari tibbi sığortadan yararlanıb.
Bu, Nazirlər Kabinetinin 2024-cü il üzrə fəaliyyəti haqqında hesabatında əksini tapıb.
Sənəddə qeyd olunub ki, il ərzində dövlət tibb müəssisələrinə 5 milyon 236 min 400 nəfər şəxs 24 milyondan çox müraciət edib. Müraciətlərin 56 faizi rayonların, 44 faizi isə Bakının payına düşüb.
Dövlət tibb müəssisələrinin əhaliyə göstərdiyi xidmətlərin sayı 83 656,5 min təşkil edib. Tibbi xidmətlərin 87 faizi ambulator, 13 faizi stasionar şəraitdə göstərilib.
Həkim-allerqoloq Şahvələd Məmmədov “Sherg.az”a bildirib ki, icbari tibbi sığorta insanlar üçün çox faydalıdır:
“Amma icbari tibbi sığortanın işləmə mexanizmində boşluqlar və çatışmazlıqlar var. İcbari tibbi sığorta ilə insanlar poliklinikalara, ambulatoriyalara gedir, ilkin müayinələrdən keçir, qan analizləri verirlər. Bəzən bu cavablar gecikir. Yəni xəstəyə bildirirlər ki, beş gündən sonra gəl cavabı götür. Bu kimi çatışmazlıqlar, boşluqlar həll olunmalıdır. Nəzərə alsaq ki, ölkənin böyük referans klinik laboratoriyası əksər poliklinika və xəstəxanaların laboratoriyasının analizlərini öhdəliyinə götürüb. Analizlər, müayinələrin problemi yoxdur. Sadəcə müəyyən gecikmələr də insan axını çox olduğundan baş verir. İnsanların problemi oldu, olmadı həkimə müraciət edir. Bu sıxlıq da, gərginlik yaradaraq həkimlərin işinə maneçilik törədir. Özəl xəstəxanalarda təcili hallarda xəstəni çox gecikdirmək olmur. Yəni təcili müayinələrdən keçirmək mümkündür. Bu baxımdan da özəllərdə müayinə və müalicə bir az, müsbət yöndə baş verir”.
