Məlumat verildiyi kimi, Zaqatala rayonu Faldarlı kəndinin 3 sakini 7 iyun 2024-cü il tarixində “Qarayara” diaqnozu şübhəsi ilə Bakı şəhəri Kliniki Tibbi Mərkəzinə hospitalizasiya olunublar.
Bu barədə Səhiyyə Nazirliyi və Tibbi Ərazi Bölmələrini İdarəetmə Birliyinin birgə məlumatında bildirib.
Xəstələrdən birində “Qarayara” diaqnozu təsdiqlənib, tibbi protokola uyğun olaraq müalicəsi davam etdirilir. Digər iki şəxsdən isə “Qarayara” şübhəsi ilə laborator müayinə üçün nümunələr götürülərək, Xüsusi Təhlükəli İnfeksiyalara Nəzarət Mərkəzinə göndərilib. Laborator müayinələrin nəticələrinə əsasən, digər iki şəxsdə də "Qarayara" xəstəliyi diaqnozu təsdiqlənib. Hazırda xəstələrin vəziyyəti qənaətbəxşdir və tibbi protokola uyğun olaraq müalicələri davam etdirilir, dinamika müsbətdir.
Qeyd edək ki, ərazi üzrə Gigiyena və Epidemiologiya Mərkəzi, Azərbaycan Respublikası Qida Təhlükəsizliyi Agentliyinin regional bölməsi, Zaqatala Heyvan Sağlamlığı və Baytarlıq Xidmətləri İdarəsi, Rayon Polis İdarəsinin əməkdaşları tərəfindən Faldarlı kəndində müvafiq tədbirlər görülüb və bu xəstəliyin ocağı lokallaşdırılıb və yeni yoluxma halları qeydə alınmayıb. Məlumat üçün bildiririk ki, “Qarayara” xəstəliyi zoonoz infeksiyadır və insandan insana ötürülmür.
Tibb elmləri doktoru professor, Adil Qeybulla "Sherg.az"a bildirib ki, “qarayara” və ya “sibir xorası” yoluxucu zoomotik infeksiyadır:
“Bu infeksiya heyvanlardan insanlara keçir. Lakin insanlar müəyyən mənbələrdən də birbaşa da yoluxa bilərlər. Daha çox infeksiya, vegetativ əmələ gətirmiş formaya keçərək uzun müddət torpaqda və su hövzələrində qalaraq yoluxa bilər. Bu xəstəlik hətta bir ərazidə olan bəzi heyvanların tamamilə məhvinə gətirib çıxarır. “Qarayara” yayılan yerdə dərhal karantin tədbirləri görülməli, baytarlıq nəzarətinə cəlb olunmalı, bütün xəstə heyvanlar məhv edilməli, onlarla əlaqədə olan heyvanlar və insanlar nəzarətə götürülməli və proses lokollaşdırılmalıdır. Əslində hospitalizasiya düzgün addımdır. Çünki bu xəstəlik izoliya olunmalı və müalicə alınmalıdır. “Qarayara” bədənin müxtəlif hissəsində böyük nekrotik yaranın əmələ gəlməsinə xarakterizə olunur. Sanki qara qərtmək şəklində bədəndə nekrotik zona yaranır. Bu “Qarayara”nın əlamətidir. Temperatur, halsızlıq, əzələ və bel ağrıları olan zaman proses ağırlaşaraq ölümə gətirib çıxara bilər. Hər halda bu ciddi infeksiyadır. Ona görə də lokollaşdırılaraq karantin tədbirləri görülməlidir”.
