Adil Qeybulla: İcbari tibbi sığortaya ayrılan maliyyə vəsaiti ilə real tibbi xidmətlər arasında əhəmiyyətli fərq mövcuddur
Hamiləlik dövründə TƏBİB-in tabeliyindəki tibb müəssisələrində təbii doğuş ödənişsiz şəkildə, yəni icbari tibbi sığorta hesabına həyata keçirilir.
Bu barədə TƏBİB-in sosial şəbəkə hesabında məlumat paylaşılıb.
Bildirilib ki, tibbi xidmətlərdən hamilə qadınların yararlanması məqsədilə hamiləliyin nəzarəti aparılan tibb müəssisəsi tərəfindən 30-cu həftəsindən sonra tərtib edilən mübadilə vərəqələri təqdim edilir:
“Hamilə qadının seçimi də nəzərə alınmaqla doğuşun təşkili və ya icrası ixtisaslı tibb müəssisəsinə yönləndirilir. İcbari tibbi sığorta çərçivəsində hamilə qadınlara doğuşaqədər tibbi xidmətlər və nəzarət, həmçinin patronaj xidməti ilkin səhiyyə xidmətinə uyğun olaraq həkim-mama ginekoloqlar tərəfindən həyata keçirilir. Tibbi göstəriş olduğu halda qeysəriyyə əməliyyatı da icbari tibbi sığorta çərçivəsində icra olunur.
Bundan əlavə, hamilə qadında digər xəstəlik aşkar olunarsa və bu diaqnoz Xidmətlər Zərfinə uyğun olaraq təminata alınıbsa, vətəndaş tibbi xidmətdən ödənişsiz əsaslarla yararlana bilər”.
Professor Adil Qeybulla “Sherg.az”a açıqlamasında deyib ki, icbari tibbi sığortaya ayrılan maliyyə vəsaiti ilə real tibbi xidmətlər arasında əhəmiyyətli fərq mövcuddur:
“Praktikada təqdim olunan xidmətlərin həcmi daha genişdir, bu isə əsasən tibb işçilərinin fədakarlığı və şəxsi təşəbbüsü hesabına həyata keçirilir. Ayrılan maliyyə resurslarının həkimlər üçün nəzərdə tutulan hissəsi kifayət qədər aşağı olduğundan, göstərilən xidmətlərin bu qədər geniş spektrdə reallaşması normativ maliyyə çərçivəsindən kənara çıxan səylər nəticəsində mümkün olur. Bununla yanaşı, icbari tibbi sığorta çərçivəsində ən azı minimal xidmət səviyyəsi təmin olunmalıdır ki, vətəndaş göstərilən tibbi xidmətin keyfiyyətinə və davamlılığına əmin olsun. Xüsusilə doğuş və təxirəsalınmaz tibbi yardım xidmətləri istənilən halda icbari tibbi sığorta paketinə daxil edilməlidir. Bu, beynəlxalq təcrübədə də qəbul olunmuş standart yanaşmadır, çünki bu xidmətlər həyati vacib və operativ müdaxilə tələb edən hallardır. Lakin bəzi klinik vəziyyətlərdə xəstənin reanimasiyaya yerləşdirilməsi, klinik vəziyyətin ağırlaşması və ya əlavə patologiyaların ortaya çıxması ehtimalı mövcuddur. Bu səbəbdən, tibbi sığorta paketi və onun əhatə dairəsi üzrə bütün aspektlər dəqiqliklə tənzimlənməlidir. İcbari tibbi sığorta mahiyyət etibarilə maliyyə sənədidir və bu baxımdan onun hüquqi və iqtisadi əsasları dəqiq və şəffaf şəkildə müəyyən olunmalıdır”.
