Günorta saatlarında uzun müddət açıq havada qalmaq məsləhət deyil.
Bu barədə Milli Hidrometeorologiya Xidməti məlumat yayıb.
"Bu gün Abşeron yarımadasında durğun və qızmar diskomfort hava şəraiti gözlənilir ki, bu da əksər əhali üçün əlverişsizdir",- məlumatda bildirilir.
Tibb elmləri doktoru, professor Adil Qeybulla "Sherg.az"a bildirib ki, yay aylarında güclü günəş şüaları və yüksək temperatur insan sağlamlığı üçün ciddi təhlükə yarada bilir:
“Xüsusilə gün vurması halsızlıq, başgicəllənmə, ürəkbulanma, hətta huşun itməsi ilə nəticələnə bilər. Günvurma, istivurma zamanı dərhal həmin şəxsi sərin bir yerə keçirmək, bədənini soyuq dəsmal ilə silmək, alnına yaş dəsmal qoymaq və bədən temperaturunu aşağı salmaq lazımdır. Bu ardıcıllıq ediləndən sonra həkim çağırılaraq digər tədbirlər görülür. Lakin bunun qarşısını almaq üçün bəzi vacib qaydalara əməl etmək lazımdır. Günəşin güclü olduğu saatlarda çöldə qalmaq olmaz. Saat 11:00-dan 17:00-a qədər günəş şüaları daha güclü və zərərlidir. Yüngül və açıq rəngli geyimlər geyinin. Gün ərzində mütəmadi olaraq sərin su içmək vacibdir. Kölgəli və havalı yerlərdə qalmağa üstünlük verin. Ağır fiziki işlərdən uzaq durun. Çöldə gəzmək üçün uyğun saatlar səhər 06:00 – 10:30; axşam isə 17:30 – 20:30-a kimidir. Bu saatlar günəşin daha zəif olduğu, havanın isə nisbətən sərin və rahat keçdiyi zamanlardır”.
