Həkimlərin əksəriyyəti səhər yeməyini əsas qida qəbulu kimi qiymətləndirir.
Səhər yeməyi orqanizmi "işə salır", ona lazım olan enerji ilə təmin edir. Təəssüf ki, insanların əksər hissəsi səhər yeməyini vacib hesab etmir və ən yaxşı halda 1 fincan qəhvə və ya çay və buterbrodla kifayətlənirlər, bir çoxları isə ümumillikdə səhər yemək yemir.
Mövzuya münasibət bildirən həkim-dietoloq Tutu Zeynalova “Sherg.az”a bildirib ki, səhər yeməyi hər insan üçün individualdır:
“Əgər insan uzun illərdir səhər yeməyi yemirsə və özünü rahat hiss edirsə, buna məcbur deyil. Son illərdə səhər yeməyini gec yeyin və heç yeməyin deyən mütəxəssislər də var. Eyni qayda da hər gün səhər yeməyi yeyən insana səhər yeməyi yemə, birbaşa günorta yeməyi ye demək də doğru deyil. Səhər tezdən oyanan kimi ilk olaraq su içməliyik. Bundan 1 saat sonra səhər yeməyi yemək olar. Çünki səhər yeməyi yeməsək özümüzü gün ərzində enerjisiz hiss edərik. Orqanizmin gün ərzində rutin işlərini görmək üçü enerjiyə ehtiyyacı var. Digər tərəfdən hamı səhər yeməyi yeməlidir deyə qayda da yoxdur. Gecikmiş səhər yeməyi yemək və ya saat 10 dan sonra 1 fincan kofe ilə çərəz yeyərək günorta yeməyinə keçmək olar. İstər səhər yeməyi yeyilsin, istərsə də yeyilməsin, arıqlamaq üçün kalori diftiti yaratmaq lazımdır. Yəni xərclədiyimizdən daha az kalori qəbul etməliyik ki, çəki verə bilək. Səhər yeməyi yeməyib, ancaq əvəzinə günorta və axşam aşırı qidalanaraq arıqlamaq olmur. Səhər yeməyi yeməyərək, günorta və axşam balanslı qidalanaraq arıqlamaq mümkündür. Bunu isə hər kəsə şamil etmək olmaz. Hər birimizin kökəlməsi də eyni deyil. Buna görə də arıqlaya bilməməyin və köklüyün səbəbini arışdırmaq lazımdır. Daha sonra ona uyğun addımlar atmaq daha məqsədə uyğun olar”.
