Diplomatlardan savayı, qəzet yazır ki, Müdafiə Nazirliyi və Milli Təhlükəsizlik Xidmətinin bəzi əməkdaşları da istefa etmək qərarına gəliblər
Ermənistanın xarici işlər nazirinin müavinləri qurumun rəhbəri vəzifəsini icra edən Ara Ayvazyanın istefasından sonra işdən getmək barədə ərizə yazıblar.
Sputnik Azərbaycan bildirir ki, bu barədə Ermənistanın "Joxovurd" (Xalq) qəzeti yazıb.
Cümə axşamı Ermənistan XİN-in mətbuat katibi Anna Nağdalyan bildirmişdi ki, Ara Ayvazyan istefa ərizəsi yazıb, ancaq səbəbini açıqlamamışdı.
"XİN başçısının istefasından sonra nazirin müavinləri də getmək barədə ərizə yazıblar, tezliklə bu barədə məlumat veriləcək", - məlumatda deyilir.
Qəzetin yazdığına görə, cümə axşamı Ayvazyan baş nazir vəzifəsini icra edən Nikol Paşinyanı qüvvələrin Ermənistan-Azərbaycan sərhədindən çəkilməsi və orada büynəlxalq müşahidəçilərin yerləşdirilməsi barədə bəyanatla çıxış etməməyə çağırıb. Paşinyan isə öz bildiyini edib, bundan sonra Ayvazyan istefa verib.
Diplomatlardan savayı, qəzet yazır ki, Müdafiə Nazirliyi və Milli Təhlükəsizlik Xidmətinin bəzi əməkdaşları da istefa etmək qərarına gəliblər.
Qeyd edək ki, mayın 27-də Ermənistan-Azərbaycan dövlət sərhədinin Kəlbəcər rayonu sahəsində Ermənistan silahlı qüvvələrinin kəşfiyyat-diversiya qruplarının fəaliyyəti ilə bağlı daxil olan əməliyyat məlumatına əsasən diversiya qrupları saat 03:00 radələrində dövlət sərhədimizi keçib və ərazilərimizin daxilində minalama işlərini və digər təxribat əməllərini aparmağa cəhd göstərib. İlkin məlumata görə, qarşı tərəfin iki kəşfiyyat-diversiya qrupu dövlət sərhədimizi iki istiqamətdə keçib. Qrupların biri 9, digəri isə 15 hərbi qulluqçudan ibarət olub. Kəşfiyyat-diversiya qruplarının hərəkəti nəzarətə götürülüb. Ərazimizdəki təminat və digər keçid yollarında minalama fəaliyyəti həyata keçirərkən Azərbaycan Ordusunun bölmələri tərəfindən düşmənin hər iki qrupuna qarşı dərhal əməliyyat tədbirləri görülüb.
Nəticədə düşmənin birinci kəşfiyyat-diversiya qrupundan 1-i zabit olmaqla 4, digərindən isə 2 hərbi qulluqçu, ümumilikdə 6 nəfər tərk-silah edilərək saxlanılıb. Kəşfiyyat-diversiya qrupunun saxlanıldığı ərazinin coğrafi koordinatları: 40 dərəcə 09 dəqiqə 06 saniyə şimal enliyi, 45 dərəcə 58 dəqiqə 07 saniyə şərq uzunluğu (N 40°09′06″; E 45°58′07″).
Digər erməni hərbi qulluqçuları ərazimizi dərhal tərk edərək geriyə çəkiliblər.
Bu gün isə Azərbaycan Müdafiə Nazirliyi mayın 27-dən 28-nə keçən gecə ərzində Naxçıvan Muxtar Respublikasının Babək rayonunun Aşağı Buzqov yaşayış məntəqəsi yaxınlığında yerləşən mövqelərimizin Ermənistan silahlı qüvvələrinin bir neçə istiqamətdə açdığı atəşə məruz qalması barədə məlumat yayıb.
Məlumata görə, atəş nəticəsində hərbi qulluqçu əsgər Muradov Elxan İlham oğlu çiynindən yaralanıb. Yaralı əsgərimizə dərhal ilkin tibbi yardım göstərilərək hospitala təxliyə edilib. Hərbi qulluqçumuzun həyatı üçün heç bir təhlükə yoxdur.
Əlahiddə Ümumqoşun Ordunun bölmələrinin cavab atəşi ilə qarşı tərəf susdurulub. Əməliyyat şəraiti Azərbaycan Ordusunun tam nəzarəti altındadır.
"Ermənistan-Azərbaycan dövlət sərhədinin Naxçıvan sahəsində vəziyyətin nisbi gərginləşdirilməsinə görə məsuliyyət tam şəkildə Ermənistanın üzərinə düşür. Ermənistan tərəfini təxribatlar törətməkdən, vəziyyətin gərginləşməsinə səbəb olacaq digər addımlardan çəkinməyə və məsuliyyətli davranmağa çağırırıq", - Müdafiə Nazirliyinin bəyanatında qeyd olunub.
