ABŞ, Polşa, Litva və Ukrayna hərbçilərinin iştirakı ilə iyulun 17-dən 30-dək “Üç Arzu-2021” adlı təlim keçiriləcək. Bu barədə Ukrayna Silahlı Qüvvələri Baş Qərargahı məlumat yayıb. Təlimlər 1 200 hərbçi, 200-dən artıq hərbi texnikanın iştirakı ilə Lvov vilayətinin Yavorov poliqonunda baş tutacaq.
![](https://sherg.az/uploads/editor/b1641d7afc04d5f2d6c26c0b452b556f.jpg)
Millət vəkili Elman Məmmədov bu təlimlər barədə “Sherg.az”a danışdı:
“Adətən belə hazırlıqlar döyüş qabiliyyətini artırmaq məqsədi daşıyır. İştirakçılar təlimin kiməsə qarşı olmadığını deyirlər. Qarşı tərəf isə- bu, indiki halda Rusiyadır- təlimləri öz təhlükəsizliyinə təhdid kimi qiymətləndirir.
Hərçənd indiyədək kimsə Rusiyaya hücum etməyib, əksinə, özü separatçılıqla məşğuldur”.
E.Məmmədovun fikrincə, rəsmi Moskva təlaşlıdır:
“Kreml narahatdır və adekvat tədbirlər görür. Çünki yaxşı bilir ki, özünün başqa ölkələrə etdiyi indi başına gələ bilər. Necə deyərlər, nə tökərsən aşına, o da çıxar qaşığına”.