Bu vəziyyət Azərbaycanla daha tez anlaşma ortamı yarada bilər
“Ermənistan Xankəndi və ətrafında yaşayan ermənilərin problemini öz üzərindən tamamilə atmağa çalışır”. Bu barədə ReAL Partiyasının sədr müavini Natiq Cəfərli deyib. Partiya funksioneri deyib ki, rəsmi İrəvan Xankədi və ətrafının de-yure Azərbaycan ərazisi olduğunu anlayır: “Bölgəyə de-fakto Rusiya nəzarət edir, amma Xankəndini və ətrafında yaşayanların maddi təminatını Ermənistan ödəyir. 2022-ci ildə 300 milyon dollara yaxın maddi yardımın göstərilməsi Ermənistan büdcəsində öz əksini tapıb. Paşinyan və komandası onların sözünə baxmayan, daha çox Rusiya və Kremlin sözçülərinə bağlı olan qondarma rejimə pul xərcləmək istəmir. 2022-ci ildə Ermənistan büdcəsi 4 mlrd. dollar olacaq.
Bunun 300 mln. dollarını Araikin dəstəsinə vermək xoş qarşılanmır. Bu vəziyyətin müsbət və mənfi tərəfləri var. Müsbət tərəfi odur ki, Ermənistan Qarabağ prosesindən çəkilərək Azərbaycan və Türkiyə ilə normal münasibətlər qurmağı, Gürcüstan üzərindən dolayı yolla Qərbə çıxmaqdansa, Türkiyə üzərindən birbaşa Qərbə çıxış əldə etməyi düşünür.
Bu yolun daha uğurlu olduğuna inanır, çünki son 200-250 il Rusiyanın maşası kimi say və nüfuz itiriblər. İndi Ermənistan cəmiyyətində anti-Rusiya fikirləri çox güclüdür. Paşinyan və komandası özbaşına Qərbyönümlü deyil, onlar cəmiyyətdə olan münasibətin siyasi tərcüməçisidir: “Rəsmi İrəvanın Xankəndi prosesindən çəkilməsi istəyi Azərbaycanla daha tez anlaşma ortamı yarada bilər. Ermənistan Qarabağ məsələsini üzərindən atıb iqtisadi yüksəlişə köklənsə, cəmi 5 ildən sonra büdcəsini 2 dəfə artıra bilər”.
N.Cəfərli məsələnin mənfi tərəflərinə də diqqət çəkib:
“Rusiya Xankəndi və ətrafında yaşayan erməni əsilli azərbaycanlıların Azərbaycana inteqrasiyasında maraqlı deyil, bunu istəmir. Ermənistan prosesdən çəkildikcə Xankəndi və ətrafında yaşayan erməni əsilli azərbaycanlılara daha çox yardım, iqtisadi fürsətlər, sosial layihələr təqdim etməklə onları özlərinə bağlayacaq. Bu gün Xankəndidə olan qondarma qurumu de-fakto tanıdığı kimi, münasibətləri daha da dərinləşdirəcək. Günün birində rejimi de-yure tanıya, qondarma qurumun geydirmə “parlamentinin” qərarı ilə orada bir ömür qalması ilə bağlı qərar çıxartdıra bilər. Bu, böyük təhlükədir”.