Vəziyyət DƏYİŞİR:  "Qisas-3" əməliyyatı başlayır?  

ABŞ inanır və ümid edir ki, Qarabağdakı ermənilər Azərbaycanın tərkibində təhlükəsiz şəkildə yaşaya bilərlər. Bunu ABŞ-nin Ermənistandakı səfiri Kristina Kvin Ermənistanın İctimai Televiziyasına müsahibəsində deyib. Separatçı ünsürlərin “vahid vətən partiyasının” rəhbəri Samvel Babayan da “Bakı ilə dialoqa” çağırış edib. O bildirib ki, “Bakı ilə Xankəndi arasında dialoqun başlaması” zəruridir: “İnam yaratmağa, müxtəlif məsələlərdə razılığa gəlməyə çalışmaq lazımdır ki, insanlar dinc və normal yaşasınlar”. Babayan bundan sonra “ikinci məsələyə” - qalan problemlərin müzakirəsinə keçəcəklərini iddia edib: “Bu yolla getməsək, qarşılıqlı etimad olmasa, heç nəyə nail ola bilmərik. İkinci “siyasi qüvvə” kimi təcili danışıqların əleyhinə deyiləm. Amma ilk növbədə bir-birimizə qarşılıqlı etimadın aşılanması üçün dialoq aparacağımız məqamlarla bağlı sənəd formalaşdırmalı, sonra başqa məsələlərə keçməliyik”. Qeyd edək ki, rəsmi Bakı dəfələrlə bəyan edib ki, Xankəndi və ətrafında yaşayan erməni icması ilə yalnız Azərbaycana inteqrasiya müzakirə oluna bilər. Azərbaycanın tələbi budur və bunu separatçı Araik Arutyunyan da etiraf edib. 

  "Atlas" Araşdırmalar Mərkəzinin rəhbəri Elxan Şahinoğlu deyib ki, Qarabağ erməniləri Bakıya gəlmək məcburiyyətində qalacaqlar. Analitik qeyd edib ki, rəsmi Bakı Qarabağ erməniləri ilə dialoqu davam etdirmək istəyir: "İkinci Qarabağ müharibəsindən sonra Azərbaycan təmsilçiləri ilə Qarabağ erməniləri arasında bir neçə dəfə dialoq olub. Müzakirələr rusiyalı hərbçilərin vasitəçiliyi ilə Qarabağ ərazisində olub. Azərbaycan Prezident Administrasiyasi bir neçə dəfə açıqlama yayaraq müzakirəni davam etdirmək üçün Qarabağ ermənilərinə Bakıya gəlməyi təklif edib. Qarabağ erməniləri Bakıya gəlməkdən imtina ediblər. Birincisi, Qarabağ erməniləri Bakıya gəlməkdən ona görə imtina ediblər ki, bu onların  Azərbaycanın ərazi bütövlüyünü qəbulu anlamına gələcək. İkincisi, Bakıdakı görüşdə Rusiya hərbi kontingentinin hərbçiləri olmayacaq. Ermənilər isə rusiyalı vasitəçilər olmadan Azərbaycan rəsmiləri ilə görüşdən qorxurlar. Buna baxmayaraq, Qarabağ erməniləri məcbur qalıb Bakıya gələcəklər. Çünki Qarabağda separatçıların nəzarət etdiyi hissədə iqtisadi və sosial vəziyyət ağırlaşıb. Xankəndidə Qarabağ separatçılarının “dövlət naziri” Qurgen Nersisyan “hökumətin” toplantısında qəbul edilən qərarları elan edib. Qarabağdakı ailələrə şəkər tozu və yağ məhsulları xüsusi yerlərdə paylanacaq. Qarabağda yanacaq çatışmazlığı olduğundan ictimai nəqliyyatın və xidməti maşınların hərəkəti məhdudlaşdırılacaq. Bu səbəbdən “dövlət idarəsinin” işçiləri evlərindən çalışacaqlar".

  E.Şahinoğlu vurğulayıb ki, Qarabağ separatçıları anlayırlar ki, onlar üçün halqa daralıb: "Rusiya hərbi kontingenti iki ildən sonra bölgəni tərk edəcək. Ermənistan Qarabağ separatçılarına dəstək verə bilməyəcək, çünki sərhəd Azərbaycanın nəzarətindədir. Belə olan halda Qarabağ ermənilərinin yeganə alternativi Azərbaycan təmsilçiləri ilə dialoqu davam etdirmək və Bakının şərtlərini qəbul etmək olacaq. Qarabağ separatçılarının lideri Araik Arutyunyan son çıxışlarının birində Bakının tələbini səsləndirib: “Bakı bizimlə ancaq Qarabağın və ermənilərin Azərbaycana reinteqrasiyasını müzakirə etmək istəyir. Bu, Bakının tələbidir”. Araik Arutyunyan Bakının Qarabağda qondarma qurumun buraxılması və quruma bağlı olan qeyri-qanuni silahlı birləşmələrin tərksilah olunmasını tələb etdiyini də xatırladıb. Araik Arutyunyan ötən ilin oktyabr ayında Ermənistan televiziya kanalına verdiyi müsahibədə də onların Bakı ilə danışıqlardan başqa alternativlərinin olmadığını bildirmişdi. Bir il ərzində erməni separatçılarının durumu daha da ağırlaşıb. Ona görə də Araik Arutyunyan Bakı ilə dialoqu qəbul etmək barədə düşünür". 

  Ekspertin fikrincə, Qarabağda ermənilər arasında Bakı ilə dialoqun vacibliyini deyən başqaları da var: "Qarabağ separatçılarının “təhlükəsizlik şurasının keçmiş katibi” Samvel Babayan da Bakı ilə dialoqun tərəfdarıdır. Aydındır ki, Qarabağ separatçıları Bakı ilə dialoqu davam etdirməyə razılaşsalar da, bu, onların öz istəkləri ilə tərksilah olunması və Azərbaycan qanunları ilə yaşamağa hazır olmaları anlamına gəlməyəcək. Onlar müqavimət göstərməyə çalışacaqlar. Ancaq separatçılar onu da anlayırlar ki, zaman onların əleyhinə işləyir. Qarabağın əsas kommunikasiya xətləri Azərbaycan Ordusunun nəzarəti altındadır, keçmiş illərdə olduğu kimi Laçın yolundan Ermənistandan Qarabağa silah və hərbi texnika keçirmək mümkün deyil. Bu vəziyyət Azərbaycanın Qarabağın tamamını nəzarət altına alacağı günü yaxınlaşdırır. Təsadüfi deyil ki, Azərbaycanda “Qisas-3” əməliyyatı barədə açıqlamalar çoxalıb, hətta dövlət televiziyasının internet saytında bu mövzuyla bağlı sorğu da keçirilir. Bu əməliyyat Azərbaycan ərazisində separatizmin sonunu gətirməlidir".