ABŞ Konqresinin Nümayəndələr Palatasının üzvü Frank Fallon ABŞ-nin Ermənistana təhlükəsizlik və humanitar sahədə dəstək verməsinin vacibliyini vurğulayıb. Amerikanın Ermənistana hərbi dəstəyi və Rusiyanı bu ölkədən sıxışdırmağa çalışması cəhdlərində yenidən Azərbaycan bəhanə kimi göstərilib. Konqresmen Qarabağın "işğal” edildiyini deməkdən çəkinməyib.
Ermənistan müdafiə nazirinin müavini də erməni ordusunun modernləşməsi üçün Pentaqondan yardım istəyib.
Siyasi şərhçi Həsrət Rüstəmov "Sherg.az"a deyib ki, bu cür bəyanatların əsas səbəbi ABŞ-nin Cənubi Qafqazda nəzarət imkanlarını artırmaqdan, buradan keçən kommunikasiyalarda və regional layihələrdə iştirakını təmin etməkdən qaynaqlanır.
Ekspert bildirib ki, ABŞ-nin regionda ən böyük səfirliyi məhz İrəvandadır və bu da təsadüfi deyil:
"ABŞ Cənubi Qafqazda Ermənistanı özünə bu yaxınlarda deyil, daha əvvəldən plasdarm seçib. Amerikalı konqresmenlərin bəyanatlarının digər səbəbləri sırasında ənənəvi xristian təəssübkeşliyi və ermənipərəstlik, həmçinin erməni lobbizminin təsirləri yer alır. Dünyaya demokratiya və insan hüquqları dərsi keçməyə iddialı olan bir dövlət üçün bu cür aşağı səviyyəli təəssübkeşlik utancverici olmalıdır. Ümumiyyətlə götürdükdə isə bu cür ədalətsiz mövqelərdən çox da narahat olmağa dəyməz. Əksinə, mövcud dünyanın siyasi reallıqlarına ayaq uydurmağımız lazımdır".
![](https://unikal.az/photos/unikal/1599336152_1581252711_1.jpg)
H.Rüstəmovun sözlərinə görə, bu cür bəyanatlar mütləq adekvat cavablandırılmalıdır:
"Amma bununla yanaşı, ABŞ və Avropa İttifaqı kimi dünya siyasətində böyük önəmi olan ölkələrlə öz dövlətimizin maraqları uğrunda ciddi diplomatik və siyasi səylər göstərməliyik. Çalışmalıyıq ki, yuxarıda sadalanan neqativliklərin xalqımızın maraqlarına ciddi ziyan vurmasına imkan verilməsin".